Qarjy maqsatty jumsalǵan ba?

Májilis Tóraǵasy Oral Muhamedjanovtyń jetekshiligimen ótken palatanyń sársenbi kúngi plenarlyq otyrysynyń kún tártibinde alty másele qaralyp, ádettegi depýtattyq saýaldar barysynda Densaýlyq saqtaý mınıstriniń komotozdyq jaǵdaıda aýrýhanaǵa túsip qalýyna oraı depýtattar óz alandaýshylyqtaryn bildirdi. Buǵan deıin Májilis depýtaty bolǵan Densaýlyq saqtaý mınıstri Jaqsylyq Dosqalıevtiń qarjy polısııasy tergeý barysynda ınsýlt (mıyna qan quıylý) alǵany anyqtalyp otyr. Shyǵys Qazaqstan oblysynyń Aıagóz aýdanyndaǵy Tarbaǵataı, Bıdaıyq, Mádenıet jáne Qos­aǵash aýyldarynyń sý qubyrlary júıesin salý barysynda kóptegen kemshilikterge oryn berilgendigi Nurtaı Sabılıanovtyń saýalyna arqaý boldy. My­saly, Qosaǵash, Mádenıet jáne Bıdaıyq aýylda­ryna sý taratý júıesin jańartýǵa 2006-2009 jyl­dary respýblı­kalyq bıýdjetten 514 mıllıon teńge jumsalsa, al Aıagóz jáne Tarbaǵataı eldi meken­derine osy maqsatqa 2007-2010 jyldary 174 mıllıon teńge shy­ǵyndalǵany belgili bolyp otyr. Depýtat osy qar­jylardyń maqsat­ty jumsal­ǵandyǵyn tekserýdi suraıdy. Zań jobalarynyń ishinen depýtattardyń qyzyǵýshylyǵyn týdyrǵan Ortalyq Azııadaǵy bes el úkimetteriniń arasyndaǵy Ha­lyq­aralyq Araldy qutqarý qory­nyń (HAQQ) jáne onyń uıym­da­rynyń mártebesi týraly kelisimdi ratıfıkasııalaýǵa qatysty zań jobasy boldy. Depýtattar suraq­ta­ryna jaýap bergen Syrtqy ister mınıstrliginiń jaýapty hatshysy Rápil Joshybaevtyń málimetine qaraǵanda, atalǵan qordyń Atqarý­shy komıtetin Almaty qalasyna kóshirgennen beri respýblıkalyq bıýdjetten 2009-2010 jyldarǵa jyl saıyn 249 mıllıon 401 myń teńge jáne fılıalyn ustap turýǵa 136 mıllıon teńge bólinip otyr. Aral teńiziniń soltústik bóligin saqtap qalýǵa, Syrdarııa ózeniniń saǵasyn kúsheıtý jónindegi jobanyń birinshi deńgeıine elimiz tarapynan 21 mıllıon 290 myń dollar bólingeni belgili boldy. Asqar TURAPBAIULY.