Elorda qaı baǵytta da úlgi kórsetýi kerek

 Elbasy Nursultan Nazarbaev Astana qalasynyń ákimi Ádilbek Jaqsybekovti qabyldady, dep habarlady Prezıdenttiń baspasóz qyzmeti. Á.Jaqsybekov Memleket basshysyna elordanyń áleýmettik-ekonomıkalyq damýy, negizgi memlekettik baǵdarlamalardyń júzege asyrylý barysy jáne aldaǵy kezeńge arnalǵan josparlar týraly baıandady. Kezdesý barysynda Qazaqstan Prezıdenti óńirlik jalpy óniminiń kólemi 4 trıllıon 560 mıllıard teńgege jetken qala búginde ósim qarqyny boıynsha elde birinshi orynda turǵanyn aıtty. Sonymen qatar, negizgi kapı­talǵa salynǵan ınvestısııalar kóleminiń ósimi baıqalýda, byl­tyrǵy jyldyń qorytyndysy boıynsha ol 770 mıllıard teńge boldy. Shaǵyn jáne orta bıznes sýbektileriniń sany 2014 jyly 93 myń bolsa, qazirgi kezde 105 myńǵa deıin jetti. Shaǵyn jáne orta bıznes sektoryndaǵy qosymsha qunnyń jıyntyq úlesi qala ekonomıkasynyń jalpy kóleminiń 62 paıyzyna jeteǵabyl. Bıyl 2,1 mıllıon sharshy metr kóleminde baspana paıdalanýǵa beriledi dep josparlanǵan, 2014 jyly bul kórsetkish 1 mıllıonnyń shamasynda bolǵan edi. Memleket basshysy áleýmettik damý ındıkatorlary arasynan jumyssyzdyq deńgeıiniń tómen ekenin jáne 6 myń bos jumys orny bar ekenin aıtyp ótti. О́tken jyl qorytyndysy boıynsha, Astanada jan basyna shaqqandaǵy ortasha tabys 3,7 mıllıon teńge boldy. Elordada balalardyń 84,5 paıyzy mektepke deıingi bilimmen qamtylǵan, balabaqshalar men mektepter qurylysy jalǵasýda. 2015 jyly jańa týǵan 100 myń sábıge shaqqanda ana ólimi 7 adamǵa teń bolsa, bıylǵy birinshi toqsanda bul kórsetkish nólge teńesti. Nursultan Nazarbaev qalany damytýǵa kapıtal salý tıimdi bolyp shyqqanyna, búginde onyń orny tolyp jatqanyna da nazar aýdardy. – Bul – qýantarlyq kórset­kish­ter, ol memlekettiń, birinshi kezekte, qala ákimdiginiń syndar­ly jumysynyń nátıjesi bolyp tabylady. Osy jumysty jal­ǵas­tyrý kerek. Elorda barlyq baǵyt boıynsha úlgi kórsetýge tıis. «Aqyldy qalany», balama ener­getıkany damytý, jylýmen jabdyqtaý, kóshelerdi abattan­dyrý, avtoturaqtar salý baǵy­tynda kóp nárse jasalýda. Qala jaqsy damyp keledi jáne buǵan qajetti óz qarajaty da bar, – dedi Qazaqstan Prezıdenti. Memleket basshysy kezdesý qorytyndysy boıynsha birqatar naqty tapsyrma berdi. Sýretti túsirgender S.BONDARENKO, B.OTARBAEV