Úndi rejısseri Djeıa Bı Arqa tórinde «Mahabbat mezgili» taqyrybynda jańa fılm túsirýde. Ol Qazaqstannyń ásem tabıǵatyna qaıran qalyp, ulan-baıtaq dalamyzdyń kórikti jerlerine qatty qyzyqqan.
– Men qazaq dalasynyń tamasha tabıǵatyna tańǵaldym. Qyzyqqanym sonshalyq, osynda kelip fılm túsirýge bel baıladym. Qazir alǵashqy túsirilimdi bastap ta kettim, – deıdi ol.
Qazirgi tańda rejısserdiń tolyq metrajdy týyndysy Almaty men Astana qalalaryn qamtyp, eki shahardyń kórikti jerleri kadrǵa enetin bolady.
Aıta keteıik, ótken jyly elimizge resmı saparmen kelgen Úndistan premer-mınıstri Narendra Modı eline oralǵan soń qazaq dalasynyń ásem tabıǵaty, záýlim ǵımarattary jaıynda aıtqan. Sodan beri rejısser Qazaqstanda kıno túsirýdi maqsat tutqan eken.
– Ádette kınony Eýropada nemese Amerıkada túsiredi. Men Qazaqstanda túsirgim keldi. Osy fılm arqyly elderińiz álemge taǵy bir tanylady dep oılaımyn. Týrızm salasynyń damýyna da túrtki bolady. Munda týrıster kóptep keledi. Sebebi, sizderdiń salt-dástúrlerińizben etene tanysqysy keletin adamdar kóp. Al fılmdi úsh aıdan keıin ekranǵa shyǵarýdy josparlap otyrmyz, – deıdi Djeıa Bı óz sózinde. Sonymen qatar, ol kınonyń basty keıipkerleri úndi ártisteri ekenin aıtty.
Talǵat RAIYMBEK,
«Egemen Qazaqstan»