Qazaqstanǵa kele jatyr
Mamyr aıynyń 27-si kúni Astanadaǵy Qazaqstan Respýblıkasynyń Ulttyq mýzeıinde «National Geographic-tiń» úzdik 50 sýreti» atty fotokórme ashylmaq. Shara «National Geographic Qazaqstan» jýrnalynyń tusaýkeser rásimi aıasynda uıymdastyrylǵaly otyr. Kórmede talǵamy joǵary kelýshilerge 128 jyldyq tarıhy bar álemdik bedeldi basylymnyń eń úzdik fotolary usynylady. Onda Stıv Makkarrıdiń dúnıeni sharlaǵan áıgili «Aýǵan qyzy» sýretinen bastap, Djeın Gýdolldyń ózindik qoltańbasy bar kadrlary, Tomas Aberkrombıdiń qaıtalanbas Mekkeniń sýreti qoıylyp, «National Geographic» tarıhyndaǵy basqa da tanymal fototýyndylar pash etiledi. Munymen qosa, kórmege kelýshiler fotosýretterdi tamashalap qana qoımaı, kadrdan tys oryn alǵan oqıǵalar týraly da bilip, ár sýrettiń tarıhyna tereń úńile alady. Uıymdastyrýshylardyń aıtýynsha, mundaǵy árbir foto adamǵa tereń oı salyp, dúnıege fılosofııalyq kózqaraspen qaraýǵa úndeıdi.
Esterińizge sala keteıik, «National Geographic Qazaqstan» jýrnaly alǵash ret elimizde bıylǵy jyldyń aqpan aıynan bastap jaryqqa shyǵyp keledi. Qazirgi kúni bedeldi basylymnyń ana tilimizdegi tórtinshi sany áziz oqyrmannyń qolyna tıdi. Osyǵan baılanysty shara barysynda jýrnaldyń resmı tusaýkeserine arnalǵan brıfıng ótkizý josparlanyp otyr.
«National Geographic» jýrnaly Ortalyq Azııa aımaǵy boıynsha alǵash ret Qazaqstanda jaryq kórdi. Qazirgi tańda álemniń 38 tilinde, 80-nen astam elge taralýda. Tili jeńil, bezendirilýi kórkem jýrnaldy oqyrman tez qabyldaıdy. «National Geographic» tarıh, geografııa, arheologııa, ǵylym men mádenıet salalary boıynsha teńdessiz fotosýretter men eksklıýzıvti maqalalardy jarııalap turady. Jýrnal planetany aıalaýdy nasıhattap, ony qorǵaýǵa úndeıdi, Jer sharynyń qaıtalanbas tabıǵatynyń ádemiligin saqtaýǵa shaqyrady.
«Egemen-aqparat»