QOSTANAI. 16 mamyr. Oblystaǵy joǵary oqý oryndary arasynda XXII dástúrli «Stýdent kóktemi» festıvali ótti. Oǵan birinshi ret Ishki ister mınıstrliginiń Sh.Qabylbaev atyndaǵy Qostanaı akademııasy da qatysty. Bul týraly Qostanaı akademııasy baspasóz qyzmetine silteme jasaǵan otyryp, egemen.kz tilshisi habarlady.
Festıval bıyl Qostanaı akademııasynyń bazasynda ótti. Onyń sharalaryna tikeleı qatysqan oblystaǵy 8 joǵary oqý oryndary stýdentteriniń sany 1500-den asady. Munyń syrtynda kórermender de kóp boldy. Jastyq ortaǵa tán debat, konferensııalar, dástúrli baıqaýlar jáne sporttyq jarystarmen qatar, bıyl alań ıesi sanalǵan Qostanaı akademııasy festıval mazmunyn jaýyngerlik estafetamen tolyqtyra tústi. Festıvaldiń ashylýyna oblys ákimi Arhımed Muhambetov qatysyp, stýdent qaýymyn quttyqtady. Sonymen qatar, ol «Stýdent kóktemin» talantty jastarǵa qanat baılaıtyn shara ekenin aıtty. Aıtpaqshy, bastaý alǵan osynsha jyldardyń ishinde jastardyń osy sharasynyń ashylýyna oblys basshylyǵy birinshi ret qatysty.
«Mádenı mura» shyǵarmashylyq baıqaýynda Rýdnyı ındýstrııalyq ınstıtýtynyń komandasy úzdik dep tanyldy. Qostanaı memlekettik pedagogıkalyq ınstıtýtynyń komandasynyń «eń úzdik shyǵarmashylyq ujym» ekenin aıtyldy. M.Dýlatov atyndaǵy Qostanaı ınjenerlik-ekonomıkalyq ýnıversıtetiniń komandasy vokaldyq shyǵarmalarymen erekshelendi. A.Baıtursynov atyndaǵy Qostanaı memlekettik ýnıversıteti komandasynyń oryndaǵan bıi «Úzdik bı» atalymyna ıe bolsa, Arqalyq memlekettik pedagogıkalyq ınstıtýtynyń stýdentteri «úzdik mýzykalyq aspappen oryndalǵan shyǵarma» atalymy kýbogyn aldy.
Qazaq jáne orys tilerinde ótken kóńildi tapqyrlar klýbynyń jeńimpazdary anyqtaldy. Qazaq lıgasynda alań ıeleri Sh.Qabylbaev atyndaǵy Qostanaı akademııasynyń komandasy birinshi oryndy aldy. Bekjat Esetov úzdik oıynshy bolsa, «Eń úzdik qyz roli» atalymy QMPI-diń stýdenti Ákimbek Inabatqa laıyq dep tanyldy. Al orys lıgasynda M.Dýlatov atyndaǵy QInEÝ komandasy úzdik dep tanyldy. Úzdik oıynshy Aleksandr Rachınskıı, qyzdardan Aıdana Esmurzına boldy.
Sportta shaǵyn fýtbol boıynsha qostanaılyq bolashaq pedagogtar birinshi oryndy ıelense, voleıboldan olardyń arqalyqtyq áriptesteri júldeni alyp ketti. Jaýyngerlik estafetada, árıne, Qostanaı akademııasy komanasynyń aldyna eshkim túse alǵan joq. «Úzdik grana laqtyrýshy» atalymy boıynsha Akademııa kýrsanty Baqtııar Sádýaqasov, mergendikten Chelıabi memlekettik ýnıvesrıteti Qostanaı fılıalynyń stýdenti Ivan Aýlov pen Alına Zaıseva birinshi oryndy aldy. «Jastar – Qazaqstannyń bolashaǵy» debat týrnıriniń qazaq, orys lıgalaryndaǵy bas júlde Qostanaı memlekettik ýnıvesrıtetiniń komandasynyń qanjyǵasynda ketti.
Festıval kilti M.Dýlatov atyndaǵy Qostanaı ınjenerlik-ekonomıkalyq ýnıversıtetiniń basshylyǵyna saltanatty túrde tapsyryldy. Keler jyly olar festıval alańynyń ıesi bolmaq.
Názıra Járimbetova
Derek, foto: Qostanaı akademııasynyń baspasóz qyzmeti.