Alla bergen úsh uly bar Ǵalym Arystanbaev zaıyby ekeýi balalar úıinen tulymshaǵy jelbiregen bir búldirshin qyzdy asyrap almaq bolǵan eken. Qansha degenmen qyz bala anaǵa jaqyn bolady, úı sharýasynda kóp nárse úırenedi, kómektesedi emes pe?!
Qyryq jastyń qyrqasyna endi shyqqaly otyrǵan Ǵalym Merki aýdandyq jergilikti polısııa bóliminiń jol polısııasy tobynda jumys isteıdi. Jumysy qaýyrt bolsa da úıdegi er balalardyń tárbıesin bir sát bosańsytqan emes. Áıtse de zaıybyna qolqanat bolar bir qyzdyń kerek bop júrgeni anyq edi. Sodan Merki aýdanyndaǵy V.Savva atyndaǵy balalar úıine jıi baryp júrgen Ǵalym men Álııa aqyrynda shańyraqtaryna bes balany jetelep kelgende kórshi-qolań, aǵaıyn-týǵandar shalqasynan túsken kórinedi.
Shynynda bireý-ekeý emes, bes birdeı balany asyrap alýǵa qazirgi zamanda qaı otbasynyń batyly barady deseńizshi... Sodan bolar alǵashynda: «Sender bul balalardy asyraı almaısyńdar, qıyn bolady, odan da osy bastan qaıtyp ótkizińder», dep úgittegender de bolypty. Degenmen de Merki kentinde turatyn Ǵalym jáne Álııa Arystanbaevtar bul jetim balalardy óz júrek qalaýlarymen asyrap alǵandyqtan olardan ajyramady. Jubaılardyń meıirim-shapaǵaty ata-anasyz ósken balalardyń júregin jylytyp, olar da arqasúıer panasy bar ekenin sezinip, qanattanyp qalǵany anyq. Qazir búkil aýyl qashan kórseń, shańyraǵy shattyqqa tolyp jatatyn osy otbasynyń bereke-birligine, yntymaǵyna súısinip júr. Alla bergen úsh ul da otbasynyń jańa múshelerimen túsinisip, áldeqashan bir úıdiń balalaryndaı tatý-tátti tirlikke kóshken.
– Rasynda o basta kelinshegim ekeýmiz balalar úıinen bir qyz asyrap alýdy oılap júrgenbiz, – deıdi Ǵalym Arystanbaev. – «Otbasy negizindegi balalar úıi» týraly arnaıy baǵdarlama bar ekenin V. Savva atyndaǵy balalar úıiniń oqytýshysy Farıdadan estidik. Sonda da bir qyz asyrap alý armanymyz boldy. Biraq, balalar úıiniń jetkinshekteri de bir úıdiń adamdaryndaı óte tatý-tátti turady eken. Tipti, bir-birin qımaıdy. Bireýin asyrap alaıyn deseń, jaqyn júrgen ekinshisiniń kózine jas tolady. Sodan kelinshegim ekeýmiz táýekel etip, bir-birine baýyr basyp qalǵan balalardy aıyrmaıyq degen nıetpen bes birdeı jetkinshekti bir-aq ertip shyqtyq. Osylaısha eki ul, úsh qyz asyrap aldyq. Bir qyzyǵy, beseýi de ártúrli ulttyń ókilderi. Úsh qyzdyń bireýi – ázerbaıjan, bireýi – qytaı, sońǵysy – ózbek. Eki uldyń úlkeni – syǵan, kishisi – orys. Bári qazaqshany óte jetik biledi. Ras, alǵashynda úıdegi úsh ul bóten balalarǵa tosyrqaı qarady. Biraq, bala emes pe, kóp uzamaı-aq bir-birimen aralasyp, oınap ketti. Úıde anam bar. Kelinshegimniń mamandyǵy – muǵalim bolǵanymen, jumys istemeıdi. Endi mine, segiz ul-qyz, anam, kelinshegim, ózim – tolyqqandy otbasy retinde tatý-tátti ómir súrip jatyrmyz. Merki – tabıǵaty óte keremet jer ǵoı. Demalys kúnderi búkil bala-shaǵamyzben taýǵa shyǵyp, serýendep, sergip qaıtqannyń ózi bir baqyt.
Mine, Ǵalym osylaısha úlken azamattyq is jasady. Shynynda balalar úıine barsań, kózderi jáýdiregen jetim balalardy kórip, júregiń aýyrady. Ár bala: «Mynaý meniń áke-sheshem emes pe eken?» dep, ár kelgen adamǵa úlken úmitpen qaraıdy. Ǵalym da, Álııa da júregi názik, obal-saýapty biletin jandar eken. Laıym, jetimderdiń janashyry bolyp júrgen Arystanbaevtar otbasyna Alla taǵalam baq-berekesin úıip tóge bersin.
Oralhan DÁÝIT,
«Egemen Qazaqstan»
Jambyl oblysy