AQSh-tyń Las-Vegas qalasynda qazaqstandyq boksshy Beıbit Shúmenov amerıkalyq Djýnıor Entonı Raıtty jeńip, WBA versııasynyń aýyr salmaqtaǵy álem chempıony atandy.
Ol qarsylasyn onynshy raýndta tehnıkalyq nokaýtpen tize búktirdi. Sóıtip, Shúmenov kásipqoı bokstaǵy 17-shi jeńisine jetti. Endi qazaq boksshysy Máskeýde reseılik Denıs Lebedevpen WBA nusqasynyń aýyr salmaqtaǵy sýperchempıony ataǵyn jeńip alý úshin qolǵap túıistiredi.
Beıbit Shúmenov buǵan deıin 18 kezdesý ótkizip, sonyń 16-synda jeńiske jetse, eki qarsylasynan utylǵan. Djýnıor Raıt kásipqoı boksta 17 ret rıngke shyǵyp, 15 jekpe-jekte utsa, bireýinde jeńilip, bireýinde teń túsken.
Qazaq boksshysy jartylaı aýyr salmaqtaǵy (79,4 kıloǵa deıin) chempıondyq ataqtardy biriktirý jekpe-jeginde Bernard Hopkınsten jeńilip qalǵannan keıin birinshi aýyr salmaqqa ótken bolatyn. Osyǵan deıin amerıkalyq bylǵary qolǵap sheberi IBF tujyrymy boıynsha álem chempıony bolsa, Beıbit WBA versııasynda sýperchempıon edi. Sodan keıin Shúmenov taǵy bir AQSh-tyń boksshysy Djeı Floresti jeńip, WBA nusqasy boıynsha álemniń ýaqytsha chempıony tıtýlyn jeńip aldy.
Qazir Halyqaralyq boks uıymynyń (IBO) tiziminde otandasymyz ondyqqa kirip otyr. Sońǵy ret atalǵan uıym naýryz aıynda barlyq salmaq dárejesindegi boksshylardyń reıtıngin jarııalaǵan bolatyn. Sol kezdegi tizimde Beıbit Shúmenov 11-shi orynnan 8-shi orynǵa kóterilgen.
Dastan KENJALIN,
«Egemen Qazaqstan»