QOSTANAI. 24 mamyr. Sot aldynda Qostanaı aýrýhanasynyń tórt dárigeri jaýap berip, jazasyn aldy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
Sot aldyna ústinen Qylmystyq kodekstiń 2 bóliminiń 114 baby boıynsha (1997 jylǵy redaksııa) is qozǵalǵan Qostanaı qalalyq aýrýhanasnyń dárigerleri V.Verko, P.Kovalev, M.Ahmadıev, A.Petrı kelip, jaýap berdi. Olarǵa atalǵan bap boıynsha «Medısına qyzmetkeriniń kásibı mindetin oryndamaǵany nemese laıyqty oryndamaǵany, sol sebepti aýrýǵa uqypsyz jáne yqylassyz qaraǵany, sonyń saldarynan adam densaýlyǵyna aýyr zııan keltirgeni úshin» degen aıyp taǵyldy.
Tergeý materıaldary boıynsha, 2012 jyly 18 qańtarda 1995 jyly týǵan Sh. degen azamatsha jol apatynan qalalyq aýrýhanaǵa túsedi. Qyzǵa «oń jaq qabaǵy soǵylǵan, basy jaralanǵan, mıy shaıqalǵan» degen dıagnoz qoıylady. Dárigerler Kovalev pen Ahmadıevtyń tekserýinen keıin qyzdy neırohırýrgııalyq bólimshege aýdarady. Jol apatyna túskennen keıin eki kún boıy qyzǵa antıbıotık dáriler egilmeıdi. Bólimshe meńgerýshisi Verko antıbıotıkti tek 20 aqpan kúni ǵana belgileıdi. Bul kezde aýrýdyń jarasy meńdep, jaǵdaıy nasharlap ketken bolatyn. 19 jáne 20 aqpan kúnderi aýrýǵa hırýrg dáriger Petrı tarapynan qaraý bolmaǵan, kúndelikti baqylamaǵan. Dárigerlerdiń nemkettiligi men salaqtyǵynan qyzdyń jarasy irińdep, bir betin túgel alyp ketedi. Bet terisin búldirip, túriniń ózgerýine alyp keledi. Qazir jábirlenýshi qara kózildiriksiz júre almaıtyn dárejege jetken.
Sottyń qaýlysy boıynsha, Kovalev, Marat Ahmadıev, Aleksandr Petrı, Vladımır Verko kináli dep tabyldy. Olardyń árqaısysyn bir jyl bas bostandyǵynan aıyrý, úsh jylǵa deıin medısına salasynda jumys isteýden alastaý jazasy kesildi. Alaıda, Qylmystyq kodekstiń 71 babymen taǵaıynlǵan bul jaza istiń eskirgenine, merziminiń ótýine baılanysty kúshin joıdy. Hırýrg-dáriger D.Qaraǵulovtyń ústinen qozǵalǵan is prokýrordyń qylmystyq is joqtyǵyn aıtýyna oraı qysqartyldy.
Sot moraldyq zııan keltirgeni úshin Qostanaı qalalyq aýrýhanasynan jábirlenýshiniń paıdasyna 200 myń teńge jáne 62 582 teńge materıaldyq shyǵyn óndirýge úkim shyǵardy.
Názıra Járimbetova.
Derek, foto: Qostanaı oblystyq sottyń baspasóz qyzmeti.