ASTANA. 24 mamyr. Mamyrdyń 21-i kúni Túrikmenstan prezıdenti Gýrbangýlı Berdymýhamedov jumys saparymen Ashhabad tóńiregindegi shekara zastavalarynyń birinde boldy. Bul týraly ras.kz aqparyna súıengen egemen.kz tilshisi habarlady.
«Gýndogar» saıtynyń jazýynsha, Túrikmenstan prezıdenti zastava aınalasynyń kórkeıip-kógaldandyrylý jáne jasyl jelekterdi kútý máselesine kóńili tolmaǵanyn bildirgen. Aarkadag sol jerde Túrikmenstan memlekettik shekara qyzmetiniń bastyǵy Begench Gýndogdyevke zastava aınalasyn tez arada tártipke keltirip, budan bylaı jemis-jıdek, kókónis jáne baqsha daqyldaryn ósirýmen aınalysýdy qatań tapsyrǵan.
«Memleket basshysy aýany tazartyp turatyn saıaly jáne qylqan japyraqty aǵashtar egip, aınalada jaqsy mıkroklımat qalyptastyrýdy, mańaıǵa jemis aǵashtaryn egip, jerdi tıimdi paıdalanýdy mindettedi. Al ózderi ósirgen kókónis jáne baý-baqsha ónimderi áskerı qyzmetkerlerdiń dastarhandaryn baıytyp qana qoımaıdy, sonymen qatar olardyń jaqsy tamaqtanyp turýlaryna jol ashady», - delingen «Túrikmenstan dáýlettik hronıkasy» (TDH) habarlamasynda.
Budan bólek, prezıdent barlyq shekara zastavalarynda «shekarashylardy jyl boıy dárýmendi azyq-túlik ónimderimen qamtamasyz etip, olardyń kúndelikti rasıondaryn paıdaly kókónistermen baıytý úshin jylyjaı sharýashylyǵyn júrgizýdi» tapsyrǵan.
Tap osyndaı jylyjaılar sharýashylyǵyn uıymdastyrý ishki ister mınıstrligine qarasty barlyq bólimshelerge de tapsyryldy.
Talǵat Raıymbek.
Derek, foto: TDH.