Alyp qazandyq

Atyraýda alǵash ret shyǵaryldy Munaıly óńirdegi baıyrǵy kásiporynnyń biregeıi sanalatyn «AtyraýNefteMash» seriktestigi alǵash ret eń aýyr ári eń iri gabarıtti ónimderdi shyǵardy. Seriktestiktiń óndiris jónindegi dırektory Sergeı Tkachýktiń málim etýinshe, elimizde dál mundaı asa aýyr salmaqtaǵy ónim osy kezge deıin shyǵarylmapty. Atyraý munaı óńdeý zaýytyndaǵy satyly jańǵyrtý, naqtylaı aıtqanda, munaıdy tereń óńdeý jobasyna arnalyp shyǵaryl­ǵan qos qazandyqtyń árqaısysy­nyń uzyndyǵy – 37,2 metr, ishki dıametri – 6 metr, al salmaǵy – 210 tonna. Atalǵan qos qazandyq kásip­orynnyń ótken jyly iske qosyl­ǵan jańa sehynda jergilikti mamandardyń temirden túıin túıetin sheber qolymen jasaldy. Jańa sehtyń aýmaǵy da úlken, uzyndyǵy 144 metrdi quraıdy. Eni – 30 metrge, al bıiktigi 60 metrge teń. Osynaý atshaptyrym aýmaǵy bar sehta aldaǵy ýaqytta budan da iri gabarıtti ónimder shyǵarý josparlanypty. Seriktestik basshylyǵy KRA kompanııasy iske asyratyn gaz-hımııa keshenine qajetti 1100 tonnalyq iri gabarıtti ónimdi shyǵarýǵa kelisim jasaýdy kózdep otyr. Qazirdiń ózinde mundaı iri ónimdi jetkizý jobasy jasalypty. Atyraý munaı óńdeý zaýy­tyndaǵy jańǵyrtý jobasy úshin budan iri gabarıtti ónimdi shyǵarý jumystary jasalýda. Iri deıtin sebebimiz, jańa ónimniń salmaǵy 440 tonnany quraıdy. Uzyndyǵy – 52 metr. Bul japondyq «Marý­benı» kompanııasynyń tapsyrysymen jasalýda. Tapsyrys berýshiniń jáne bas merdigerdiń suraýymen jańa ónimniń sońǵy qurastyrý jumystary munaı óńdeý zaýytynyń alańynda iske asyrylady. О́ıtkeni, bıiktigi 52 metrdi quraıtyn dúnıeni tikesi­nen turǵan kúıinde tasymaldaý múmkin emes. – Alǵashqy iri gabarıtti ónim­der shyǵarý oıdaǵydaı iske asty. Sheteldik kompanııalar­dyń tapsyrysy da, senimi de aqtaldy. Bizdiń jergilikti mamandarymyz buryn Eýropa elderinde shyǵarylatyn iri ga­barıtti qazandyqtar jasaýdy­ meńgerdi. Bul – bizdiń kásip­oryn mamandarynyń alǵashqy je­tis­tigi. Árıne, mundaı ónimder shyǵarý ońaı emes. Ásirese, mamandarymyz kúrdeli ınjenerlik sheshimderdi iske asyrýda sheber­lik, biliktilik tanytty, – deıdi «AtyraýNefteMash» JShS-niń óndiris jónindegi dırektory Sergeı Tkachýk. Joldasbek ShО́PEǴUL, «Egemen Qazaqstan» ATYRAÝ