Mádenıet jáne sport mınıstri Arystanbek Muhamedıulynyń halyq aldynda esep berý kezdesýi ótti. El turǵyndary mádenıet, óner, sport, tilderdiń damýy, úkimettik emes uıymdardyń qyzmeti jáne din salasyndaǵy ózderin qyzyqtyratyn suraqtaryna mınıstrden tikeleı jaýap aldy.
Kezdesýge kelgen qalyń jurtshylyq qana emes, elimizdiń barlyq aımaqtarynyń turǵyndary da suraq qoıý múmkindigine ıe boldy. О́zge oblystardyń ókilderi úshin mınıstrliktiń resmı saıtynda suraq qoıý fýnksııasy bar arnaıy bólim ashyldy.
Kezdesý barysynda Arystanbek Muhamedıuly Mınıstrliktiń esep berý kezindegi qyzmeti týraly baıandap, quzyryndaǵy salalarda atqarylyp jatqan jumystar men memlekettik organnyń bolashaq josparlarymen bólisti.
Vedomstvo basshysy baıandamasynyń basty taqyryptary Elbasynyń bes ınstıtýttyq reformasyn iske asyrý boıynsha «100 naqty qadam» Ult Jospary, Qazaqstan Respýblıkasynyń Mádenı saıasat tujyrymdamasy jáne t.b. memlekettik qujattarda kózdelgen maqsat-mindetterdi oryndaý úrdisiniń ózekti máselelerin qamtydy.
«Ult Josparyn iske asyrý maqsatynda 2015 jyly salany jańǵyrtýǵa baǵyttalǵan 19 normatıvtik-quqyqtyq akti qabyldandy. Mádenıet salasynda «Qazaqstan Respýblıkasynyń keıbir zańnamalyq aktilerine mádenıet jáne tarıhı-mádenı mura máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy qabyldandy», – dedi mınıstr.
«Sondaı-aq, Zańnyń normalaryn iske asyrý maqsatynda 2015 jyly mádenıet jáne óner salalary boıynsha salalyq kórkemdik keńester qurylyp, tabysty qyzmet etýde. Mádenı saıasat tujyrymdamasyna engizilgen ózgerister men tolyqtyrýlar sheńberinde mádenı-týrıstik klasterlerdi odan ári damytýǵa erekshe mán berildi», – dedi A.Muhamedıuly.
Sondaı-aq, keler jyly Astanada ótetin EKSPO-2017 halyqaralyq kórmesine arnalǵan Keshendi mádenı baǵdarlama ázirlengenin de atap ótti.
Qazirgi ýaqytta Qazaqstannyń mádenıettegi mártebesin kóterip turǵan salanyń biri kıno desek artyq bolmas. Basqosý barysynda Mınıstr bul taqyrypty da aınalyp ótpedi.
«Otandyq kınematografııanyń odan ári damýy úshin bıyl elimizde kınoóndirisin damytý tujyrymdamasy jasalady. Sonymen qatar, kıno týraly bólek zań ázirleý máselesi de qarastyrylýda, óıtkeni, «Mádenıet týraly» Zańda ulttyq kınoóndiristi qoldaýǵa baılanysty barlyq aspektilerdi tolyqqandy qarastyrý, salanyń uzaqmerzimdi damýynyń basymdyqtaryn anyqtaý múmkin emes», – dep sózin jalǵastyrdy mınıstr.
Budan bólek, esep berý aıasynda otandyq sport jáne dene shynyqtyrýdyń damý bolashaǵy, Rıo-de-Janeırodaǵy Olımpıada oıyndaryna daıyndyq barysy da baıandaldy.
Sonymen qatar, «Tilderdi damytý bólimi qoǵamdyq-saıası jumys salasynda mınıstrlik alǵa qoıǵan barlyq mindetterdi belsendi iske asyrýda», – dedi mınıstr.
Ol 2015 jyly memlekettik organdar, kitaphanalar, tilderdi damytý jáne bilim berý jónindegi aımaqtyq mekemeler boıynsha taratylǵan 6 sózdik, balalar ádebıetiniń 10 túri, 11 oqý-ádistemelik quraldar shyǵarylǵandyǵyn qosa aıtty. Balalardyń sóıleý qabiletterin damytý barysynda 15 tomnan turatyn aýdıokitaptar jınaǵy, 50 bólimdi anımasııalyq fılm shyǵarylǵanyn maqtanyshpen jetkizdi.
Tatýlyq pen beıbit ómirdi beıneleıtin Islam dininiń keleshegi de keleli kezdesýde keńinen qozǵaldy.
Jıyn sońynda mınıstr elimizdiń damýyna eleýli úles qosyp kele jatqan Mádenıet jáne sport mınıstrliginiń aldaǵy ýaqytta atqarar qyzmet aýqymy úlken ekenin jáne júktelgen mindetterdi jumyla kóteretindikterin alǵa tartty.
Raýan QAIDAR,
«Egemen Qazaqstan»