Keshe Úkimet úıinde Qazaqstan Respýblıkasy Premer-Mınıstriniń birinshi orynbasary Baqytjan Saǵyntaev Sıngapýr Respýblıkasynyń Memlekettik saýda jáne ındýstrııa mınıstri, Memlekettik ulttyq damý mınıstri Ko Po Kýnmen kezdesti, dep habarlady Premer-Mınıstrdiń baspasóz qyzmeti.
Taraptar Qazaqstan men Sıngapýr arasyndaǵy ekijaqty qarym-qatynastardyń jaǵdaıy men damý perspektıvalaryn qarastyrdy. Baqytjan Saǵyntaev pen Ko Po Kýn saýda-ekonomıkalyq jáne ınvestısııalyq ózara is-qımyldardy ulǵaıtý qajettigi jóninde oı bólisti.
Premer-Mınıstrdiń birinshi orynbasary Qazaqstannyń Sıngapýrdyń áleýmettik-ekonomıkalyq damý tájirıbelerin belsendi túrde ózine beıimdep jatqan elderdiń biri bolyp tabylatynyn atap ótti. Onyń ishinde «Samuryq-Qazyna» Ulttyq ál-aýqat qoryn qurý, memlekettik qyzmettiń jańa modelin engizý, elektrondy úkimetti damytý jáne basqalar bar.
Kelissózder barysynda, sondaı-aq, ónerkásiptik yqpaldastyq, ınfraqurylymdyq jobalar sheńberindegi, qarjy salasyndaǵy ózara is-qımyldar da talqylandy.