Qazaqstan quramasynan jartylaı fınalǵa shyqty
Astanada bokstan áıelder arasynda ótip jatqan álem chempıonatynda keshe Qazaqstan quramasynan alty sportshy jartylaı fınalǵa shyqty.
Shırek fınalda Nazym Qyzaıbaı (48 kg) úndi qyzy Sarjýbala Shamjetsabamdy, Jaına Shekerbekova (51 kg) germanııalyq Azıza Nımanıdi, Dına Jolaman (54 kg) japon Aıa Shınmotony jeńse, Aıman Qojabekova (57 kg) Qytaı boksshysy Meılın Gaony, Valentına Halzova (69 kg) ırlandııalyq Greınnı Ýolshty, Lázzat Kúngeıbaeva (-81 kg) úndistandyq Sımoı Poonıany tize búktirdi. Jekpe-jekterde otandastarymyz qarsylastaryn aıqyn basymdyqpen utty. Ásirese, Halzovanyń aıqasy qyzyqty ótti. Kezdesýde Valentına Ýolshty tehnıkalyq nokaýtqa jiberdi.
Shırek fınalda Zarına Soloevanyń (64 kg) joly bolmady. Ol chempıonatty jaqsy bastaǵanymen, osy kezeńde qarsylasynan aılasyn asyra almady. Sonyń aldynda Rımma Volosenko
(60 kg) men Iýldýz Mamatkýlova (-81 kg) jarys jolynan shyǵyp qalǵan bolatyn. Qazaqstan quramasynda jartylaı fınalǵa shyqqandardyń barlyǵynyń altyn medal alýǵa múmkindigi bar. Ásirese, chempıondyq ataqqa Nazym Qyzaıbaıdyń úmiti mol. Bul qyzymyz – 2014 jylǵy álem chempıony. Sodan keıin ol 51 kıloǵa deıingi salmaqqa aýysyp, biraz ýaqyt kóleńkede qalyp qoıǵan edi. Álem chempıonaty aldynda Nazym salmaq qýyp, 48 kıloǵa qaıta aýysty. Osy salmaqta Qyzaıbaı jarys bastalysymen, qarsylastaryn asa qınalmaı jeńip keledi.
Keshe keshkisin Vıoletta Knıazeva (75 kg) sharshy alańǵa shyqty.
Astanada ótip jatqan álem chempıonaty elimizde alǵash ret ótkizilip jatyr. Bul dodada boksshylar Olımpııa oıyndaryna lısenzııany sarapqa salady.
Dastan KENJALIN,
«Egemen Qazaqstan»