Qazaqstannyń búkil óńirinde Oljas Súleımenovtiń 80 jyldyq mereıtoıy asqan súıispenshilikpen atalyp ótýde. Sonyń biri – Ulttyq mýzeıde uıymdastyrylǵan «O. Súleımenov poezııasyndaǵy tarıh jáne taǵylym» atty ǵylymı konferensııa.
Sharaǵa alys jáne jaqyn shetelderden mártebeli qonaqtar, belgili memleket jáne qoǵam qaıratkerleri, qoǵamdyq uıymdardyń ókilderi, joǵary oqý oryndarynyń basshylary, sonymen qatar ǵalymdar men stýdentter qatysty.
Konferensııada Ulttyq mýzeıdiń dırektory Darhan Myńbaı aqyn Oljas Súleımenovtiń shyǵarmashylyǵy men qalamgerdiń qoǵamdaǵy orny týraly aıta kelip: «Oljas Súleımenov – biz úshin ǵana emes, bizdiń urpaqtarymyz úshin de maqtanysh bolatyn tulǵa. Onyń belsendiligin, qoǵam úshin atqarǵan eńbegin el-jurty jaqsy baǵalaıdy. Ol Qazaqstan úshin de, álem úshin de eńbekteri eń kóp taralymmen shyǵyp, kóp oqylǵan aqyn», – dedi.
Oljas Omarulynyń jazýshylyǵy, qaıratkerligi, «Nevada- Semeı» qozǵalysynyń jetekshisi retindegi atqarǵan róli, ǵalymdyǵy, saıasatkerligi búginde dúnıe júzi halyqtaryna málim jaıttar.
«Halyqaralyq jıyndarda, ǵylymı konferensııalarda, saıasatta, poezııada Oljastyń boıy da, oıy da eshqashan alasaryp kóringen emes. Ol únemi el mártebesin kóterýmen keledi. Oljas Súleımenov azamattyq, adamzattyq bıik poezııany jasaýshy», – dedi jıynda sóz alǵan qoǵam qaıratkeri Myrzataı Joldasbekov.
Ǵylymı joba aıasynda Oljas Omarulynyń jazǵan muralaryn jańa tyń derekter negizinde zerdeleý, jastardy otanshyldyq pen patrıotızmge tárbıeleý, sondaı-aq qazaq memlekettiginiń qalyptasýyna jáne damý kezeńderine qosqan úlesin ǵylymı turǵyda júıeleý jaıynda oılar aıtyldy. Ǵylymı konferensııa barysynda O.Súleımenovtiń shyǵarmashylyǵy men ómirine arnalǵan foto jáne kitap kórmeleri arqyly ǵajaıyp syrlar shertildi.
Qarshyǵa KÚLEN