«Grınlend» demalys bazasynda «Jastar – aýyl resýrsy» I shekaralyq aýyl jastary sleti ótti. Oǵan elimizdiń irgeles jatqan Aqtóbe, Atyraý, Batys Qazaqstan, Qostanaı, Qyzylorda, Mańǵystaý oblystarynan, kórshiles Reseı Federasııasynyń Bashqurt Respýblıkasy men Orynbor oblysynan aýyl jastary qozǵalystarynyń kóshbasshylary qatysty. Shara qonaqtarynyń qatarynda Nıderlandtan kelgen saıahatshylar da boldy.
Aýyl jastarynyń alqaly jıynyna oblys ákimi Berdibek Saparbaev qatysyp, sletke qatysýshylarǵa quttyqtaý sóz arnady.
– Memleket basshysy N.Nazarbaev jastardyń ózderin damytýy úshin qajetti jaǵdaılardy jasap keledi. Búginde jastardy qoldaýǵa baǵyttalǵan kóptegen memlekettik baǵdarlama qabyldandy. Mysaly, «Bolashaq» baǵdarlamasy. 20 jyldan beri osy baǵdarlama boıynsha elimizdiń talapty jastary álemniń jetekshi oqý oryndarynda tegin bilim alyp keledi. Búginde atalǵan baǵdarlamanyń 10 myń qatysýshysy elimizdiń túkpir-túkpirinde, ekonomıkanyń túrli salalarynda eńbek etip júr. Biz qoldaý tanytyp kele jatqan ekinshi baǵdarlama – «Jasyl el», – dedi óziniń sózinde Berdibek Saparbaev.
Onyń aıtýynsha, 2016 jyly óńirde osy baǵdarlamany júzege asyrý úshin 300 mıllıon teńge bólingen. Aımaqta jas ǵalymdar keńesi qurylǵan, oǵan kóptegen talantty jastar kirse, olardy qoldaýǵa da 100 mıllıon teńge bólinip otyr. Sondaı-aq, jastar resýrstyq ortalyǵy men «Aqtóbe jastary» uıymy jumys isteıdi. «Biz jastar máselesimen aınalysatyn uıymdardyń bir baǵytta birlese otyryp jumys jasaǵandaryn qalaımyz», – dedi Berdibek Máshbekuly.
О́tkizilip jatqan sharanyń mańyzy týraly «Jasyl el» jastar eńbek jasaǵy respýblıkalyq shtabynyń jetekshisi Rahat Hamıdýllın baıandady.
Slet barysynda aýyl jastary arasynan sharýalar men bıznesmenderdiń, jastar uıymdary kóshbasshylarynyń jobalary tanystyryldy. Shara barysynda, sonymen birge, respýblıkalyq «Gúldene ber, týǵan el!» marafon-estafetasy aksııasy jáne formaldy emes pikirtalas alańdary uıymdastyryldy. Sletke qatysýshylar aǵash kóshetterin otyrǵyzdy. Túrli konkýrstar ótkizildi.
Satybaldy SÁÝIRBAI,
«Egemen Qazaqstan»
Aqtóbe oblysy