PETROPAVL. 26 mamyr. Qyzyljar óńirine Aýyl sharýashylyǵy mınıstri Asqar Myrzahmetov jumys saparymen kelip, kóktemgi egis jaǵdaıymen tanysty.Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady.
Aýyl sharýashylyǵy mınıstri Qyzyljar aýdanyna at basyn tiredi. Munda «Peterfeld-Agro» 5 jyldan beri mal sharýashylyǵymen aınalysyp keledi. Qazir seriktestikte 3 myń bas iri qara maly ósiriledi.
Mınıstrmen kezdesýde jer kodeksine qatysty áńgime qozǵaldy. «Zenchenko jáne K» seriktestiginiń bas dırektory Gennadıı Zenchenko jerdiń jeke menshikke berilýi sharalaryn qoldaıtynyn jetkizdi.
Bul sharýashylyqta da mal sharýashylyǵy jaqsy damyp keledi. Sút fermalarynda kúnine 20 tonnaǵa jýyq ónim alynady. Kórsetkishti 35 tonnaǵa deıin jetkizý josparlanǵan. Qazir Novonıkolskoe aýylynda sporttyq keshen qurylysy, 10 turǵyn úı salynýda.
Asqar Myrzahmetov oblys agroqurylym jetekshilerimen keńes ótkizip, aımaq basshysy Erik Sultanov AО́K damýy týraly baıandady.
Agrarshylar respýblıkalyq mańyzy bar birqatar problemalardy ortaǵa saldy. Máselen, «Taıynsha Astyq» serktestiginiń basshysy Anatolıı Rafalskııdi súttiń baǵasy tolǵandyrdy. Mınıstrdiń jáne salalyq departamenti basshylarynyń bergen jaýaptaryna qaraǵanda sýbsıdııalar tóleý boıynsha baǵdarlamaǵa ózgerister engizilip jatqan kórinedi. Al sútti satyp alý baǵasyn ákimdikter bekitedi. Dıqandardy elıtalyq tuqymdarǵa degen jeńildikter, sý máselesi de mazalaıdy. Egin egýdi sýbsıdııalaý máselesi de qamtyldy.
Jıyn sońynda Asqar Myrzahmetov sút qabyldaý beketterin qurýdy usyndy. Onyń aıtýynsha, jumysy toqtap turǵan sút zaýyttary az emes.
Mınıstr Taıynsha aýdanynyń sharýashylyqtaryn da aralady.
О́mir Esqalı.
Derek, foto: Soltústik Qazaqstan oblysy ákimdiginiń baspasóz qyzmeti.