Urpaq umytpaıdy

Halyq qaharmany, armııa generaly S.Nurmaǵambetovke eskertkish ornatyldy Aqmola oblysynda elimizdiń tuńǵysh Qorǵanys mınıstri, Keńes Odaǵynyń Batyry, Halyq qahar­many, armııa generaly Saǵadat Nurmaǵambetov músininiń saltanatty ashylý rásimi ótti. Saltanatty jıynda Saǵadat aǵanyń qyzy Aısulý Nur­maǵam­betova keıingi urpaqtyń áke­sine eskert­kish ornatyp, qurmet kór­set­­­­kenine rızashylyǵyn bildir­di. – Biz ákemizdiń qurmetine oraı ol kisiniń týyp-ósken jerinde eskertkish ornatylǵanyna alǵys bildiremiz. Bıyl ol 92 jasqa tolar edi. Ákemiz adamdarǵa udaıy qamqorlyq pen jomarttyq tanytatyn. Ol jalyndy patrıot, óziniń ustanymdaryna berik, ǵumyryn Otanǵa qyzmet etýge sarp etken adal kisi bolatyn, – dedi Aısulý Nurmaǵambetova. Odan keıin Qorǵanys mınıs­triniń birinshi orynbasary – Qarýly Kúshter Bas shtabynyń bas­tyǵy, general-polkovnık Sáken Jasuzaqov sóz sóılep, «Ha­lyq qaharmanynyń» elimizdiń táýelsizdigi araılap atqan jyly áskerı vedomstvony basqaryp, áskerılerge úlgi tutar azamat bolǵanyn atap ótti. «Aty ańyzǵa aınalǵan generaldyń ómirlik joly – bul kóptegen áskerı qyzmetshiler úshin Otanǵa sheksiz adal qyzmet etý men erliktiń jarqyn úlgisi. Biz barlyǵymyz Qarýly Kúshterimiz qurylǵan sol kúrdeli, qıyn-qystaý kezeńdi jaqsy bilemiz. Ol shynymen óziniń taǵ­dyryn áskerı qyzmetpen baı­lanystyrǵan árbir adam úshin úlgi boldy», – dedi ol. Eskertkishtiń ashylý rásimine Qorǵanys mınıstrliginiń basshy­lary, Qarýly Kúshter Qurlyq áskerleriniń bas qolbas­shy­lary, jergilikti ákimdik, áskerı qyzmetshiler, «Jas ulan» respýb­lıkalyq mektebiniń tárbıele­nýshileri men Uly Otan soǵysynyń ardagerleri qatysty. Dastan KENJALIN, «Egemen Qazaqstan» Aqmola oblysy