Memleket basshysy Nursultan Nazarbaev «Sberbank Rossıı» AAQ prezıdenti jáne basqarma tóraǵasy German Grefti qabyldady, dep habarlady Prezıdenttiń baspasóz qyzmeti.
Kezdesý barysynda banktiń Qazaqstandaǵy qyzmetiniń máseleleri, sondaı-aq, eldiń qarjy sektory men bank júıesin odan ári damytý perspektıvalary talqylandy.
Elbasy «Sberbank» Qazaqstan naryǵynda 10 jyldan beri jumys istep kele jatqanyn, osy ýaqyt ishinde respýblıkanyń jetekshi qarjy-nesıe mekemeleriniń birine aınalǵanyn aıtty.
Nursultan Nazarbaev qazirgi kezde kóptegen elder men qarjy ınstıtýttary qıyndyq kórip otyrǵanyn, problemalardy sheshý joldaryn birlese kúsh-jiger jumsaý arqyly izdestirýdiń mańyzdy ekenin atap ótti.
G.Gref Qazaqstan Prezıdentine bank salasyn damytý máselelerine udaıy kóńil bólip otyratyny úshin rızashylyq bildirdi.
– Qazirgi daǵdarys bizge jumysymyzda neni jaqsartý kerektigin sezinýge múmkindik berdi. Qıyndyqtarǵa qaramastan, bank qyzmeti byltyrǵyǵa qaraǵanda bıyl aıtarlyqtaı turaqty boldy. Jalpy, daǵdarys bizge taıaý kezeńde eldegi jumysymyzǵa, atap aıtqanda, táýekel menedjementin jetildirý jáne sońǵy tehnologııalardy anyqtaý salasyndaǵy qyzmetimizge birshama ózgertý engizý qajettigin aıqyn ańdatyp otyr, – dedi G.Gref.