Murat NURǴALIEV,
«Ekonomıkalyq bastamalardyń qazaqstandyq qory» AQ dırektorynyń mindetin atqarýshy:
– Árıne, árbir forýmnan biz úlken nátıje kútemiz. Qazirgi kezde álem ekonomıkasynyń kóptegen problemalarǵa tap bolyp, damýdyń basqa joldaryn izdep jatqanyn biz jaqsy bilemiz. Shıkizat paıda tabýdyń basty kózi emes ekenin túsinetin kez keldi. Sol sebepti búginde Qazaqstanǵa shıkizat naryǵynan bólek damýdyń jańa joldaryn izdeý kerek. Osy oraıda álemdik aty bar ekonomıster men Nobel syılyǵy laýreattarynyń kómegi zor. Sarapshylardyń kómegine júginip, biz óz jolymyzdy tabýymyz qajet. Al forýmda biz naqty óz usynystarymyzdy talqyǵa salatyn bolamyz. Osynyń arqasynda qolǵa alǵan jobalardyń qanshalyqty tıimdi ekenin bilýge tyrysamyz. Negizgi másele – shıkizattan birte-birte bas tartý. Onyń ornyna balamaly energııa kózderin damytý mańyzdy.
Maqsat QAIRANBAEV,
«Qazaqstannyń ekonomıkalyq bastamalary» qorynyń bas menedjeri:
– Astana ekonomıkalyq forýmynyń basqa forýmdardan ereksheligi – onyń dúnıe júzinde ótkizilip jatqan ekonomıka salasyndaǵy myqty forýmdardyń bestigine kiretindiginde. Bizdiń forýmdy basqa forýmdarmen salystyrýǵa kelmeıdi. Bizdiń dárejemiz ol forýmdarǵa qaraǵanda áldeqaıda joǵary. Sondyqtan bizge jaı azamattar emes, kóbinese shetelden kelgen qonaqtar men úlken qyzmetterde bolǵan azamattar, memleket basshylary, úkimet basshylary keledi. Dúnıejúzi boıynsha myqty sarapshylar qatysady. Bizdiń alańda Qazaqstanǵa ǵana qatysty emes, Eýrazııa qurlyǵy, Taıaý Shyǵys pen jalpy búkil dúnıe júzine qatysty úlken máseleler qaralady. Osy elderdiń arasyndaǵy ekonomıkalyq qarym-qatynas, áleýmettik máseleler aıtylyp, jaqsy tujyrymdamalar jasalady.