Torǵaı tylsymy

Japondyq telekompanııa qazaq jerinde osy qupııaǵa den qoıdy Japonııanyń Fuji Television telekompanııasy «Mystery All the world» «Álemniń bar shalǵaıy­nyń qupııalary» atty tanymal baǵdarlamasy úshin Torǵaı geoglıfteri týraly fılm túsir­di. Kúnshyǵys eliniń belgili telekompanııasynyń ókilderin Torǵaı dalasyna «Torǵaı sharshysyn» alǵash baıqaǵan, Turgay Discovery jobasynyń jetekshisi Dmıtrıı Deı óz ekspedısııasy quramynda alyp bardy. «Torǵaı dalasyndaǵy arheolo­gııalyq qubylysqa japon televı­zııasynyń qyzyǵýshylyǵy arqa­synda Qazaqstannyń tarıhı eskert­kishteri men mádenıetin halyq­aralyq medıa keńistikte nası­hattaý men keńinen taratý úshin eki kúndik saparymyzdy uıymdastyryp, júzege asyrýdyń sáti tústi. Ekspedısııa quramynda japon telekompanııasynyń teleoperatory ári reporteri Kakınýma San, Turgay Discovery jobasynyń jetekshisi ózim, jobanyń zertteý­shisi Sergeı Kozın bar», – dep jazdy Dmıtrıı Deı áleýmettik jelidegi paraqshasynda. Japonııanyń Fuji Television telekompanııasy túsirgen qazaq­standyq geoglıfter týraly materıal «Mystery All the world» baǵdarlamasynda 2016 jyldyń maýsym aıynda kórsetiledi. Topyraq úıindilerinen tu­ra­tyn geometrııalyq bederler joǵarydan túsirgende ǵana anyq kórinedi. Búginde Qostanaı oblysynyń ońtústigindegi Torǵaı dalasynan krest, svastıka, sheńber úlgisindegi júzdegen geoglıfter tabylyp otyr. Bir qyzyǵy, olardyń barlyǵy da bir-birinen alys emes, bir aýmaqta – Torǵaı ıininde jatyr. Qazaqstandyq jáne sheteldik azýyn aıǵa bile­gen ǵalymdardyń barlyǵy da Torǵaıdan tabylǵan geoglıfterdi ejelgi mádenıetpen baılanystyrady jáne olardy Mysyr pıramıdalary, Ońtústik jáne Or­talyq Amerıkadaǵy minájat nysandary men brıtanııalyq Stoýn­hendj sekildi álemdik brendter qataryna jatqyzady. Dmıtrıı Deıdiń pikirinshe, qazaq­standyq geoglıfterge ázir­she sheteldik ǵalymdar kóbirek qyzyǵýshylyq tanytyp otyr. Amerıkalyq NASA ǵarysh agent­tigi Torǵaı geoglıfterin kóbeıtip taratty. «Qazǵarysh» munan keıin qaıta túsirdi. Túrkııada 2014 jy­ly ótken Eýropa arheologtary qaýym­dastyǵynyń forýmynda Torǵaıda tabylǵan bul oljalar sensasııa retinde baǵalandy. Názıra JÁRIMBETOVA, «Egemen Qazaqstan» Qostanaı oblysy