QHR-daǵy Shyńjań ólkesiniń Ile aımaǵynda aıtýly at jarysy ótti
Qara jerdiń apshysyn qýyrǵan alaman báıge Shyńjańnyń Ile aımaǵyna qarasty Kúnes aýdanynda ótti. Naqtyraq aıtqanda, at jarys atalǵan aýdannyń Taldy qalashyǵyndaǵy Iinjar ıppodromynda uıymdastyryldy.
Alamanǵa aýyzdyǵymen alysqan 42 sáıgúlik qatysyp, 10 shaqyrymdy shaýyp ótti. Munan soń 3 jáne 5 shaqyrym qashyqtyqtaǵy taı men qunan, 3,5 shaqyrymdyq jorǵa jarysy dúldúlderdi anyqtady.
Osy kúni at báıgesinen bólek, Taldy qalashyǵynda sporttyq sharalar uıymdastyryldy. Boz kilemde 60 jáne 80 kılo salmaqtaǵy balýandar beldesti. Eń qyzyǵy – boıynda kúsh-qýaty tasyǵan qaqpaq jaýyryndy azamattar buqa tartysyna qatysty. Sonymen qatar, 10 juptan quralǵan qyz ben jigit «Qyz qýý» oıynyn kórsetti.
Osylaısha, Shyńjań aımaǵyndaǵy qandastarymyz ata-babamyzdan kele jatqan salt-dástúrdi dáriptep, ulttyq oıyndarymyzdy jańǵyrtty. Ondaǵy azamattardyń aıtýynsha, osyndaı sporttyq sharalar jyl saıyn mamyr aıynda uıymdastyrylyp turady eken.
Talǵat RAIYMBEK,
«Egemen Qazaqstan»