Músinder múlgimeıdi

Italııalyq sýretshi Marıo Pavezıdiń Ulttyq mýzeıdegi «Basqa kókjıekter» atty jeke kórmesinen sheberdiń eń tańdaýly týyndylaryn tamashalýǵa bolady. Aıta ketetin jaıt, kórmeni uıymdastyrýǵa Mádenıet jáne sport mınıstrligi men Italııanyń Qazaqstandaǵy elshiligi muryndyq bolyp otyr. Sharanyń ashylý saltanatynda Ulttyq mýzeıdiń dırektory Darhan Myńbaı sheberdiń kóp­qyrly talant ıesi ekendigin aıryqsha atap ótti. «Bul kórme Qazaqstandaǵy Ita­lııa kúnderiniń aıasynda ótýde. Asqan talant ıesiniń eńbekteri adamnyń ishki jan dúnıesin ashyp kórsetýge qurylǵan deýge bolady. Avtordyń árbir eńbeginde ózine tán qoltańbasy aıqyn sezilip turady», – dedi mýzeı basshysy. Marıo Pavezıdiń ómirbaıany týraly berilgen qysqasha málimette: «1945 jylǵy 5 tamyzda Red­jo Emı­lııa provınsııasyndaǵy Gvas­talla qalasynda dúnıege kelgen Marıo ataqty músinshi Ýmber­to Mastroıannıdiń aqylymen Bo­lone­­degi Kórkemóner Akade­mııasyna túsip, músin jasaýdy jaqsy meńgeredi. Marıo jastaıynan kóptegen pishinderge aınalýǵa ıkemdi, aqpa jáne ser­pindi materıaldy óńdep, jandandyrýymen erekshelenedi. Pavezı qyryq jyldyq shyǵar­mashylyq qyzmetinde, únemi sýret naryǵy men sánniń zamanaýı talabyna qaramastan, ár­daıym óz maqsaty men únemi shyǵarmashylyq dara­lyǵyn izdeýi nátıjesinde músinniń jáne kórkem sýrettiń kóptegen túrleri men janrlaryn baıqap kóredi. Onyń týyndylary sulýlyqpen tyǵyz baılanysqa negizdelgen, árdaıym turaqty jáne naqty zattardyń shynaıy mánin kórsetetin sýbstrat sııaqty» delingen. Sonymen qatar, biz kórmedegi týyndylar arqyly sheberdiń janrdy jan-jaqty meńgergen ámbebap maman ekendigine kózimiz jetýde. Birqatar músinderi («Qaı­ta ór­kendeý», «Qudaılardyń qu­laýy», «Shabyt», «Ásemdik») HH ǵasyrdyń kópqyrly reńkterimen jáne tehnıkalyq naqty ádistermen tolyqtyrylǵan klassıkalyq úlgi­simen áserlendiredi. Ásirese, «Tepe-teńdik», «Buqa», «Túńilý» týyndylary óte joǵary talǵammen oryndalýymen qyzyqtyrady. Boıaýǵa júrek lúpilin qosyp óretin shyǵarmashylyq ıesiniń árbir týyndysy ýaqyt tynysyn, jaratylys qudiretin, este qalar erekshe sáttegi minez-qulyq pen ishki syrdy aıqyn da aıshyqty bere alýymen tamsantady. Aıryqsha mezetti sýretteıtin bulardyń bárine ortaq qasıet – qyzýqandylyqty, buǵaýlanbas asaýlyqty, sezimge toly kúıdi jyrlaıdy. Sonyń bári tastyń, metaldyń tabıǵatyn barynsha zerttep, zerdelep erekshe sezimmen jumys isteıtin sheberdiń jan áleminiń aınasy tárizdenedi. Bir týyndyǵa kóp maǵyna syıǵyza bilý degen sóz osyndaıda aıtylsa kerek. Músinderdiń múlgimeıtini ras eken. Qarshyǵa KÚLEN Sýretterde: Marıo Pavezı týyndylary