Málimetter boıynsha, zırat Halkıdıkı túbegindegi kóne qala Stagır aýmaǵynda jatqan kórinedi. Áıgili fılosoftyń jatqan jerin alǵash bolyp Kostas Sısmanıdıs esimdi grek arheologi anyqtaǵan. Bul týraly ol «Arıstotel – 2400» atty konferensııada málimdedi.
Qazba jumystary 1996 jyly bastalǵan. Sodan kúni búginge deıin tabylǵan jádigerler Arıstotelge tıesili bolýy múmkin degen boljam ǵana jasalyp kelgen. Al Kostas Sısmanıdıs jıyn barysynda qabirdiń grek fılosofyna tıesili ekenin dáleldeıtin aıǵaqtar tapqanyn aıtty.
– Biz Arıstoteldiń qabirin anyqtadyq. Sonymen qatar, qazba jumystary kezinde kóne derekkózderde aıtylatyn qabir men qurban shalatyn oryndy (altar) jáne adamdar jınalatyn orynǵa jaqyn jerde jatqan tabytqa aparatyn joldy taptyq», – dedi Kostas Sısmandıs.
Onyń aıtýynsha, zırat Stagır qalasynyń soltústigindegi bıikteý jotanyń qasynda ornalasqan. Aıtpaqshy, Arıstotel bizdiń dáýirimizge deıingi 384 jyly dál osy qalada dúnıege kelgen. Tarıhta ol Platonnyń shákirti, Eskendir Zulqarnaıynnyń aqylshysy «birinshi ustaz» degen atpen qalǵan. Formaldy logıkanyń negizin qalaýshy, fılosofııanyń jan-jaqty júıesin qalyptastyrýshy ári óz zamanynyń dara danyshpany bolǵan.
Aıan ÁBDÝÁLI,
«Egemen Qazaqstan»