Keshe mektep bitirýshilerdiń bilim synaǵy – Ulttyq biryńǵaı testileý bastaldy
Mektep bitirýshi túlekterdiń 11 jyl boıy jıǵan bilimin saralap, synǵa salatyn, ustazdardyń eńbegin, ata-ananyń úmitin bezbendeıtin ýaqyt ta kelip jetti. Keshe elimizde Ulttyq biryńǵaı testileý bastaldy. Ol bıyl 15 maýsymǵa deıin sozylady.
Bilim jáne ǵylym mınıstrligi 121 092 oqýshy mektep bitiretinin málimdedi. Olardyń 83 330-y – qazaq tilinde, qalǵan 37 762-si orys tilinde mektep bitiretinder bolyp otyr. Al synaq tapsyrýǵa barlyǵy 86 991 túlek qatysady. Bul barlyq túlektiń 72 paıyzyn quraıdy. Osy kórsetkish boıynsha 63 021 túlek memlekettik tilde, al 23 970 túlek orys tilinde tapsyrady.
Ulttyq biryńǵaı testileý barlyǵy 166 pýnktte ótedi. Onyń 116-sy aýdan, 50-i oblystyq ortalyqtarda, sondaı-aq, Astana men Almaty qalalarynyń joǵary oqý oryndarynyń ǵımarattarynda ornalasqan. Bul oryndarda synaq tapsyratyndardyń sany bir kúnde 600 túlek bolady.
Test ótetin ǵımarattardaǵy tártip te, tekseris te burynǵydaı. Uıaly telefon, «shpargalka» syndy zattardyń bar-joǵy qatań tekseriledi. Sonymen qatar, bul jylǵy talap ta ózgergen joq. Oqýshylar barlyǵy 5 pán boıynsha test tapsyrady. Bas-aıaǵy 3,5 saǵat ishinde 125 suraqtyń jaýabyn belgileýi tıis. Joǵary oqý ornyna túsemin degen túlekter keminde 50 ball jınaýy qajet. Al ulttyq ýnıversıtetterde bilim alǵysy keletinderdiń kórsetkishi 70 baldan tómen bolmaǵany jón.
Aıta keterligi, bıyl azdaǵan ózgerister engizildi. Synaqtan súrinip, 50 ball jınaı almaǵandarǵa ulttyq biryńǵaı testileýdi ekinshi ret tapsyrýǵa múmkindik beriledi. Bul túlekterdiń joǵary bilim alýǵa qoljetimdiligin arttyrý úshin jasalyp otyr. Alaıda, synaqtan ekinshi márte ótkender bilim grantyna ıe bola almaıdy.
Aıan ÁBDÝÁLI,
«Egemen Qazaqstan»