Baspanaly bolý baqyty

Sońǵy jyldary Aqtóbe qala­synda turǵyn úı qurylysy qarqyndy júrgizilýde. Osydan bir aı shamasynda 234 jas otbasy qoljetimdi páterge ıe bolyp, qonys toıyn toılaǵan bolatyn. Jaqynda taǵy da 270 aqtóbelik otbasy turǵyn úı qurylys jınaq banki júıesi boıynsha jańa páterge qonystandy. Osy saltanatty sharaǵa qatysqan oblys ákimi Berdibek Saparbaev sý jańa páterge ıe bolǵandarǵa izgi tilegin bildirip, páter kiltterin tapsyrdy. «Nur Aqtóbe» turǵyn úı ala­­byndaǵy boı kótergen jańa úı «О́ńirlerdi damytý-2020» baǵ­da­r­lamasy boıynsha salynǵan. №20 úıdiń aýlasynda ótken saltanatty sharaǵa «Turǵyn úı qurylys jı­naq banki» AQ basqarma basshysy Aıbatyr Jumaǵulov ta qatysty. О́ńir basshysy «О́ńirlerdi damytý» memlekettik baǵdarlamasy aıasynda «Halyqtyń barlyq sanatyna arnalǵan turǵyn úı» baǵyty bo­ıynsha oblysta 14 turǵyn úı paı­dalanýǵa berilgenin, sonyń nátı­jesinde 2832 adam jańa pá­ter­ge ıe bolǵanyn jetkizdi. «Jas otba­sy­larǵa arnalǵan turǵyn úı» baǵ­dar­­lamasy boıynsha 432 páterli 2 úı paı­dalanýǵa berilgenin de atap ótti. Memlekettik baǵdarlama bo­ıynsha salynǵan úılerdiń baǵasy naryqtaǵy baǵadan áldeqaıda tómen. Toǵyz qabatty jańa úıdegi páterlerdiń ár sharshy metri 100 myń teńge turady. – Elimiz táýelsizdik alǵan jyldardan beri memlekettiń áleýmettik saıasaty halyqty jan-jaqty qamtý jáne turǵyn úımen qamta­m­asyz etýge arnaldy. О́ńirlerdi damytýdyń 2020 jylǵa deıingi baǵdarlamasy, sondaı-aq, «Nurly Jol» baǵdarlamasy arqyly turǵyn úı ınfraqurylymyn damy­tý el azamattaryn turǵyn úımen qam­tamasyz etýdiń negizgi ózegi­ne aınaldy. Bıyl óńirde 580 myń sharshy metrge jýyq turǵyn úı paı­dalanýǵa beriledi. Sonyń nátı­jesinde 5 myń otbasy jańa páter­ge ıe bolady, — dedi Berdibek Máshbekuly. Qonystoı ıeleri atynan sóz alǵan Sáýle Sarına mem­lekettik baǵdarlamanyń arqa­synda úsh bólmeli páterge qol jetkizgenin Elbasy Nursultan Nazarbaevtyń sarabdal saıasatymen sabaqtastyra kelip, sol úshin Memleket basshysyna, osyndaı baǵdarlamany aımaqta júıeli júzege asyryp otyrǵan oblys basshylyǵyna rızashylyǵyn bildirdi. Satybaldy SÁÝIRBAI, «Egemen Qazaqstan» Aqtóbe oblysy