ASTANA. 3 maýsym. Ázerbaıjanda taıaý aralyqta mektepterde orys tilinde oqytý júıesiniń toqtatylýy múmkin. Bul týraly Oxu.Az portalyna aqparyna súıengen egemen.kz tilshisi habarlady.
Nasımı atyndaǵy Ázerbaıjan til bilimi ınstıtýtynyń ǵylymı qyzmetkeri Djahıd Ismaıyloglý orys tiliniń ımperııadan qalǵan qaldyq bolyp tabylatynyn aıtady. Onyń pikirishe, jaǵdaı bulaı bolyp kete berse, ázerbaıjan tiliniń damýyna edáýir kedergi keltiriledi. Sondyqtan orys tilinde oqytý júıesinen qysqa merzim ishinde qutylý kerek.
«Biz, ázerbaıjandar, uzaq jyldar boıy eki til jaǵdaıynda ómir súrip keldik te, orys tiline aıryqsha mańyz berdik, keı jaǵdaılarda ol ana tilimizden de asyp túsip turdy», – deıdi ol. Mamannyń aıtýynsha, qazirgi tańda Ázerbaıjanda orys tilin damytýdyń úlken negizi bar, endi bilim júıesinde orys sektorynyń bola berýi ázerbaıjan tiliniń, sonyń ishinde balalar ádebıetiniń damýyna kóp kedergi keltiredi.
«Sondyqtan bizdiń elimizde týǵan tilimizde bilim alý eshbir balamasyz mindetti nárse bolýǵa tıis, orys sektoryn joıýymyz kerek, al orys tilin shetel tilderi qatarynda oqytýǵa kóshken jón. Olaı bolmaǵan jaǵdaıda týǵan tildi damytýǵa degen suranys bolmaı qalyp, ázerbaıjan tilin damytý tejele beredi», – dedi ǵylymı qyzmetker sosyn.
«Bir mysal keltireıin. Búginde ata-analardyń kópshiligi ózderiniń balalaryn orys sektorynda oqytyp júrgenderin ázerbaıjan tilindegi mektepterdi oqý quraldyry men ádebıettiń jetimsizdigimen baılanystyrady. Ras, bizde mundaı jetimsizdik bar. Biraq dál qazirgideı alternatıvti tilde bilim alý jalǵasyp turǵan kezde bul jetimsizdiktiń bolǵany – bolǵan, óz tilimizde oqýǵa degen ynta ázir týa qoımaıdy», – dep atap ótti Ismaıyloglý.
Talǵat Raıymbek.
Derek, foto: Oxu.Az.