ASTANA. 3 maýsym. Senbi, 4 maýsym kúni Qaraǵandy oblysynyń burynǵy ákimi Baýyrjan Ábdishevti shartty-merziminen buryn bosatý týraly qaýly kúshine enedi. Bul týraly «Novyı vestnık» aqparyna súıengen egemen.kz tilshisi habarlady.
«Osy máseleni qaraǵan sot otyrysynyń ótkenine 15 kún boldy», - delingen habarlamada.
Málim bolǵandaı, búgin Baýyrjan Túıteıuly óziniń týǵan kúnin atap ótip jatyr. Ol 48 jasqa tolyp, kezekti múshelin bastady.
Aıta ketýimiz kerek, Baýyrjan Ábdishev 2014 jylǵy 23 qyrkúıek kúni ustalǵan bolatyn. Al 26 qyrkúıekte qamaýǵa alyndy. Sol ýaqyttan beri burynǵy ákim qulyp astynda 1 jyl, 8 aı jáne 12 kún otyrdy. Bul ýaqyttardy ol ýaqytsha ustaý oqshaýlaǵyshynda jáne úkim shyqqannan keıin AK 159/1 kolonııasynda ótkizdi.
Qaraǵandy oblysynyń eks-ákimine qatysty úkim 2015 jyldyń jeltoqsan aıynda shyqty. Oǵan jemqorlyq sıpatyndaǵy qylmystar jasady degen aıyp taǵyldy. Sonyń ishinde bızneske zańsyz qatysqany, kásipkerlikke kedergi keltirgeni, qyzmet jaǵdaıyn asyra paıdalanǵany aıtyldy. Sottalýshy munyń bárin moıyndady.
Osy qylmystary úshin eks-ákimge dúnıe-múlikterin tárkilep, jalpy rejimdegi kolonııada 5 jyl otyrý jazasy kesildi. Naýryz aıynda appelıasııalyq alqa bul verdıktti ózgertti. Onyń jazasy 3 jyl túrmede otyrýǵa kemitildi. Sonyń sońynan merziminen buryn túrmeden bosatyp, jazasyn shartty negizge almastyrýǵa sheshim qabyldandy.
Talǵat Raıymbek.
Derek, foto: Novyı vestnık.