Keshe Astanadaǵy Ulttyq akademııalyq kitaphanada Qazaqstan Respýblıkasynyń Memlekettik rámizder kúnine arnalǵan dóńgelek ústel ótti.
Jıyndy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti men Investısııalar jáne damý mınıstrligi Tehnıkalyq retteý jáne metrologııa komıteti uıymdastyrdy. Dóńgelek ústelge Tilderdi damytý jáne qoǵamdyq-saıası jumys komıtetiniń tóraǵasy Qýanysh Asylov, Tehnıkalyq retteý jáne metrologııa komıteti tóraǵasynyń orynbasary Ǵalym Doǵalov, Eltańba avtory Jandarbek Málibekuly, «Aıqyn» gazetiniń bas redaktory Nurtóre Júsip, «Nur Otan» partııasy «Birlik» fılıaly tóraǵasynyń birinshi orynbasary Álııa Qaısharova, úkimettik emes uıymdardyń ókilderi jáne basqa da arnaıy shaqyrylǵan qonaqtar qatysty.
Otyrysty ashqan Qýanysh Asylov birinshi kezekte qatysýshylardy 4 maýsym – Memlekettik rámizder kúnimen quttyqtady.
«Biz elimiz úshin óte mańyzdy Rámizder kúni merekesin osymen 9-shy ret atap ótkeli otyrmyz. Memlekettik rámizder patrıottyq sezimniń negizin qalaıtyn atrıbýttar. Rámizderimizdi qurmettep, ony el ishine nasıhattaýdyń mańyzy zor. Halqymyz memlekettik rámizderimizdiń merekesin atap ótý qarsańynda tur. Rámizder kúni elimiz boıynsha bir mezette Ánuranymyz shyrqalady. Sondaı-aq, patrıottyq tárbıe berý baǵytyndaǵy túrli is-sharalar ótkiziledi ári osynaý mereke barysynda laıyqty azamattardy marapattaý bolady. Olarǵa medaldar, Alǵys hattar, maqtaý qaǵazdary tapsyrylady», – dedi Q.Asylov.
Odan ári ol «100 naqty qadam» Ult Jospary aıasynda patrıottyq tárbıe berý isi jáne memlekettik rámizderimizdi dáripteý jańasha sıpatta qarqyn alyp otyrǵanyn sóz ete kelip, aýmaqtyq rámizder men memlekettik rámizder salasynda zańnamalardyń jetildirilgeni jáne ony qoldaný tájirıbesi týraly aıtyp ótti.
Álııa Qaısharova óz kezeginde memlekettik rámizder eldigimizdiń belgisi ekenin sóz ete kelip, Qazaqstannyń Týy álemniń kóptegen elderinde jelbirep, Ánuranymyz jahandyq aýqymdy sharalarda shyrqalyp júrgeni árbir otandasymyzdyń maqtanysh sezimin oıatatynyn jetkizdi. Onyń aıtýynsha, urpaq tárbıesinde rámizderimizdiń orny erekshe.
Al sharaǵa qurmetti qonaq retinde shaqyrylǵan Memlekettik eltańba avtory Jandarbek Málibekov Eltańbanyń jasalý tarıhy týraly áńgimeleı kelip, oǵan aldaǵy ýaqytta engizilýi yqtımal ózgerister, standarttaý qaǵıdalarynyń jańashyldyqtary týraly aıtyp berdi. Onyń aıtýynsha, aldaǵy ýaqytta Eltańba altyn tústes bolýy múmkin. Sondaı-aq, Eltańbadaǵy 40-tan astam belgilerge naqty ataýlaryn kórsetý kózdelýde.
Budan keıin sóz alǵan Ǵalym Doǵalov óz kezeginde memlekettik rámizderdiń mańyzdylyǵyn, onyń el ómirindegi aıryqsha ornyn sóz ete kelip, ony standarttaý turǵysyndaǵy máselelerge nazar aýdardy.
Jıyn barysynda qatysýshylar ózara pikir alysyp, ózderiniń oılarynda júrgen suraqtaryn qoıdy. О́z kezekterinde atalǵan komıtet ókilderi qoıylǵan saýaldarǵa naqty jaýap berdi.
Aıta keteıik, memlekettik rámizderimiz elimizdiń jańa tarıhymen tyǵyz baılanysty. Rámizder kúniniń negizgi ıdeıasy qazaqstandyq patrıotızm men ult birligin, halqymyzdyń birligi men jetistikterin nyǵaıta túsý bolyp tabylady.
Joldybaı BAZAR,
«Egemen Qazaqstan»