Keshe Prezıdent janyndaǵy Ortalyq kommýnıkasııalar qyzmetinde «Qaraǵandy oblysyndaǵy metallýrgııalyq kremnıı óndirisi jónindegi zaýyttyń daıyndyq jumystary jáne iske qosý» taqyrybynda brıfıng ótti.
BAQ ókilderimen kezdesý barysynda birqatar derekterdi alǵa tartqan «Tau-Ken Temir» JShS basqarma tóraǵasy Murat Júkenov «Taý-Ken Samuryq» UTK» AQ «Qaraǵandy oblysyndaǵy metallýrgııalyq kremnıı óndirisi jónindegi zaýyttyń daıyndyq jumystary jáne iske qosý» atty ınvestısııalyq-strategııalyq jobany iske asyrý jónindegi operator bolyp taǵaıyndalǵanyn málimdedi. Onyń aıtýy boıynsha, jobany jandandyrý maqsatynda «Taý-Ken Samuryq» UTK AQ-tyń 100% enshiles uıymy bolyp tabylatyn «Tau-Ken Temir» JShS 2014 jyly óndiristik keshenniń tehnıkalyq jaǵdaıyn baǵalap, №1 peshti qaıta iske qosty.
Búgingi tańda «Tau-Ken Temir» JShS Qazaqstanda jumys istep turǵan birden-bir metallýrgııalyq kremnıı óndirýshi bolyp tabylady. Zaýyttyń óndiristik kesheni árqaısysynyń tolyq qýaty 30 MVA eki kendi termııalyq peshten turady, sondaı-aq, zamanaýı qondyrǵylarmen jabdyqtalǵan. Atalǵan kásiporynnyń shıkizat bazasy Qaraǵandy oblysynyń Ulytaý aýdanyndaǵy Jezqazǵan qalasynyń soltústik-batysynda 130 shaqyrymda ornalasqan «Aqtas» kenishi. Bul kenishtiń kvarsy joǵary tazalyǵymen erekshelenedi.
Elmıra MÁTIBAEVA,
«Egemen Qazaqstan»