Tirini óldi deýge bola ma?

Atyraý turǵyny Elena Prıdanova óziniń jer basyp júrgenin sot arqyly dáleldedi Ár adam óziniń aldynda ne kútip turǵanyn eshqashan bile qoımas, sirá. Áıtpese, qatelikke de uryndyrar shalys qadam jasamas edi. Tipti, taǵdyrdyń teperishin de kórmegen bolar edi. Degenmen, Atyraýdyń turǵyny Elena Prıdanovanyń basynan ótkeni eriksiz oıǵa qaldyrady. Ol óziniń azamattyq nekedegi kúıeýi Nıkolaı Orlovpen birge úsh bala tárbıelep, qala irgesindegi sharýa qojalyqtarynyń birinde jaldamaly jumys jasaǵan. Qojalyq ıesiniń ýaqytsha baspanasynda turǵan. Kúndelikti ishetin tamaq, ýaqyt ótkizer jumys tabylǵasyn, Nıkolaı men Elena alańsyz júre bergen. Nıkolaıdyń týys­tary bar-joǵy belgisiz, al Elena óziniń týysqandarymen múldem habarlaspaı qoıypty. Alaıda, olar turyp jatqan baspana órtenip, bir kúnde ári jumyssyz, ári baspanasyz qaldy. Qaqaǵan qysta úsh balamen dalada qalǵan otbasynyń ahýaly áleýmettik jeli arqyly belgili boldy. Jergilikti bıliktiń aralasýymen Nıkolaı men Elenaǵa qoldaý kórsetildi. Sol kezde azamattyq nekedegi erli-zaıyptylardyń da, olardyń balalarynyń da jeke basyn kýálandyratyn qujattary joq ekeni anyqtaldy. Bir tań­danarlyǵy, Elena Prıdanova qaıtys bolǵandar sanatynda bolyp shyqty. Turmystyń aýyrlyǵy arqaǵa batqany azdaı, óziniń óliler sanatynda bolýy Elenaǵa jyǵyl­ǵan sátte jelkesine tıgen judy­ryqtaı áser etti. Endi oǵan tiri ekenin dáleldeý úshin ne isteý kerek edi? – Azamatsha E.Prıdanova uzaq ýaqyt boıy Atyraý oblysyndaǵy aýyldyq okrýgterdiń birinde ómir súrip, týystarymen habarlaspaǵan. Birneshe jyldar ótkennen keıin turmystyq zorlyq-zombylyqtan zardap shekken áıelderge arnalǵan daǵdarys ortalyǵyna túsken ýaqytta óziniń qaza tapqandar esebinde turǵanyn bilgen. О́z quqyǵyn qorǵaý maqsatynda Atyraý qalalyq sotyna ózine qatysty qaıtys bolý týraly aktilik jazbanyń jáne qaıtys bolý týraly kýálikti zańsyz dep tabý týraly aryzben júgingen. Sot otyrysynda jedel izdestirý sharalaryn júrgizý barysynda fotosýretter arqyly aryzdanýshynyń týystary máıittiń uqsas bolýyna baılanysty E.Prıdanova dep tanyǵany anyqtaldy. Keıinnen aryzdanýshynyń týystarynyń biri azamatsha E.Prıdanovany qaıtys boldy dep taný týraly kýáligin alǵan. Sot otyrysynda aryzdanýshynyń barlyq týystary E.Prıdanovany ózderiniń ápkesi, tátesi retinde tanyǵan. Jınaqtalǵan barlyq dáleldemelerdiń jıyntyǵymen sot aryzdanýshy E.Prıdanovanyń talabyn negizdi dep tanyp, oǵan qatysty qaıtys bolý týraly aktilik jazbany jáne qaıtys bolý týraly kýálikti zańsyz dep tanydy, – dep habarlady Atyraý oblystyq sotynyń baspasóz hatshysy Boranbaı Ǵalıev. Teginde, tiri adamdy óldi deý­ge bola ma? Desek te, taǵ­dyr­dyń teperishin kórgen, turmy­sy­nyń aýyrlyǵyna kóngen Elena Prıdanova óziniń tiri ekenin sot arqyly dáleldedi. Endi ol ózin ómirge jańa kelgendeı sezinedi. Shyn­dyǵynda, endi azamattyq ne­kedegi kúıeýi Nıkolaı Orlovpen birge úsh bala tárbıele­gen onyń ómi­ri jańa arnaǵa bet buratyn bolar... Joldasbek ShО́PEǴUL, «Egemen Qazaqstan» ATYRAÝ