Qyzylordada jumyspen qamtyla bastady
Buryndary «sottalǵan» degen sózdi estisek, ol adam jumysqa jaramsyz nemese múgedek tárizdi kórinetin. Nege ekenin qaıdam, abaqtynyń arǵy jaǵynan oralǵandardy qoǵam shettetip, adam teris aınalatyn dárejede boldy. Al qazir she?
Qazir jazasyn óteýshilerge memleket qamqorlyq tanyta bastady. Sonymen qatar, olar túzetý mekemelerinde júrip-aq jumyspen qamtylyp, jalaqy alyp, eńbekke tartyla bastady. Tipti, jumyspen qamtý ortalyqtary sottalyp kelgenderdiń ózin jumysqa ornalastyrý máselesin sheship berýde.
Taıaýda Qyzylorda oblystyq prokýratýrasy «Túzeý mekemelerindegilerdi jumyspen qamtý-2017» jobasy negizinde naqty sharalar qabyldady. Osynyń nátıjesinde ZK-169/4 qonys-kolonııasynda bas bostandyǵynan aıyrylǵandar eńbekke tartyldy. Naqtyraq aıtqanda, 25 sottalýshy kirpish shyǵaratyn zaýytqa ornalastyryldy. Eń bastysy, bul azamattardyń tártibi men túzelý jolyna túsýi eskerilip, olardy shartty túrde merziminen buryn bosatý jáne jeńil jazaǵa aýystyrý jaǵy qarastyryldy.
Búginde sottalǵandardy jumyspen tolyq qamtýdyń nátıjesinde memleket qazynasyna 2 755 200 teńge qarjy túsken.
Aıta keteıik, Syr óńirindegi ózge de túzeý mekemelerinde jazasyn óteýshilerdi jumyspen qamtý jyl sońyna deıin 75 paıyzǵa jetetin bolady.
Talǵat RAIYMBEK,
«Egemen Qazaqstan»