ASTANA. 5 maýsym. Búgin, jeksenbi kúni Aqtóbe qalasynda bolǵan atystyń saldarynan alty adam qaza tapty. Bul týraly ishki ister mınıstrliginiń resmı ókili Almas Sádýbaevtyń málimeti negizinde «Qazaqstan jańalyqtary» jetkizgen aqparǵa súıengen egemen.kz tilshisi habarlady.
Almas Sádýbaevtyń aıtýynsha, oblystyq ishki ister departamentine belgisiz bireýlerdiń Aqtóbedegi qarý satatyn «Palada» dúkenine, al saǵat 15:45 (Astana ýaqyty boıynsha) shamasynda basqa qarý satatyn magazın men ulttyq ulan ásker bólimine shabýyl jasaǵany týraly dabyl túsken. Shabýyl barysynda «Pallada» dúkeniniń satýshysy qaza tapqan, taǵy bir adam jaraqattanyp qalǵan. Sonyń ishinde shabýylǵa toıtarys berý kezinde bir ofıser men shartpen alynǵan bir áskerı qyzmetker qaza taýyp, toǵyz áskerı qyzmetker jaralanǵan. Qabyldanǵan sharalardyń nátıjesinde shabýyl jasaýshylardyń úsheýi jer jastandyrylǵan, bir qaraqshy jaraqat alǵan. Osy shaıqasta birneshe qylmyskerdi aýyzdyqtaýdyń oraıy kelgen. Taǵy birneshe shabýyl jasaýshy qursaýdan qutylyp ketken.
Qazir alynǵan aqparlarǵa qaraǵanda, olardy qolǵa túsirýdiń amaldary jasalyp jatyr. Shabýyl jasaǵandar, boljam boıynsha, dástúrli emes radıkaldy dinı aǵymdardyń músheleri kórinedi.
«Aqtóbede antıterrorlyq operasııa rejımi jarııalanyp, kóńil kóteretin mekemeler jumysy men qoǵamdyq kólikter qozǵalysy toqtatyldy», – delingen habarlamada.
Talǵat Raıymbek.
Derek: Qazaqstan jańalyqtary.
Foto, vıdeo: Dıapazon.