Keshe «Aqtóbe aqparat» ortalyǵynda oblys ákimi Berdibek Saparbaev BAQ ókilderimen brıfıng ótkizip, terrorıstik oqıǵaǵa baılanysty málimdeme jasady, naqty jaǵdaıdan habardar etti.
О́ńir basshysy qazirgi kezde oblystaǵy jaǵdaıdyń jergilikti atqarýshy bılik pen quqyq qorǵaý organdarynyń baqylaýynda ekenin, oblys ákimdiginde óńirlik jedel shtab jumysy uıymdastyrylǵanyn, Ulttyq qaýipsizdik departamentiniń jetekshiligimen terrorǵa qarsy ortalyq jumys isteýde ekenin jetkizdi. Barlyq quqyq qorǵaý jáne arnaıy organdarmen tyǵyz baılanys ornatylǵanyn atap ótti.
– Qarý-jaraq dúkeni men ulttyq gvardııa áskerı bólimine jasalǵan shabýylǵa qatysy bar qalǵan qylmyskerlerdi joıý boıynsha is-sharalar jalǵasýda. Qazirgi kezde 12 qylmyskerdiń kózi joıylyp, 5-eýi ustaldy, qalǵan qylmyskerlerdiń jeke basynyń málimetteri anyqtalyp, olardy ustaý boıynsha jedel is-sharalar júrip jatyr. Búgin medısınalyq mekemelerge birneshe jaralanǵandar ákelindi, olardyń arasynda beıbit turǵyndar men quqyq qorǵaý organdarynyń qyzmetkerleri joq, negizinen ákelingender qylmyskerler. Keshe qaza tapqan áskerı qyzmetkerlerdiń otbasylaryna materıaldyq kómek kórsetiletin boldy. Barlyq kommýnaldyq qyzmetter, qoǵamdyq kólikter men medısınalyq mekemeler shtattyq rejimde jumys jasaýda.
Sonymen qatar, biz turǵyndardyń antıterrorıstik operasııalardy júrgizý barysynda halyq kóp shoǵyrlanatyn jerler men kóńil kóterý oryndaryna barmaýyna keńes beremiz. Memlekettik organdardyń júrgizip jatqan jumystaryna, onyń ishinde quqyq qorǵaý organdarynyń qujattardy tekserý áreketine túsinistikpen qarap, qajettiligine qaraı tıisti qoldaý kórsetýlerińizdi suraımyz. Túrli áńgimelerge boı aldyrmaı, tek qana memlekettik organdardyń resmı aqparattaryn basshylyqqa alýlaryńyzdy suraımyz, – dedi Berdibek Máshbekuly.
Qazir qalada lańkesterdi quryqtaý operasııasy jalǵasýda. Oblys ortalyǵynda terrorlyq áreketke qarsy kúsheıtilgen rejim engizildi.
Satybaldy SÁÝIRBAI, «Egemen Qazaqstan» Aqtóbe oblysy