Báısheshekter! Qala kósheleriniń boıynda osy bir názik gúlderdiń boı kóterýi – kópten beri bolmaǵan qyzyqty qubylys. Janyńdy jadyratatyn jaıt. Bıylǵy kóktem de ózge jyldarmen salystyra qaraǵanda erekshe, ári aıryqsha bolýymen kópshiliktiń kóńilinde qalatyn shyǵar. Dalany masaty kilemdeı túrlendirgen bıylǵy kóktemdegi qyzǵaldaqtar she?
Bizdiń aýyldyń mańaıynda qyzǵaldaqtar sáýir týmaı jatyp búr jarýshy edi. Ýys-ýys etip úıge de ákeletinbiz. Reseıdiń Saratov gýbernııasymen kórshi turatynbyz. Qyzǵaldaqtardyń kóp, tyǵyz ósetini sonshalyq, dala beıne bir qyzyl túske oranǵandaı kúı keshýshi edik. Onyń hosh ıisine toımaıtynbyz. Osyndaı kezde kókten tikushaqtyń daýysy estilip, kóp keshikpeı shaǵyn áýe kóligi qyzǵaldaǵy qulpyrǵan dalamyzǵa tik shanshylyp tómendep kele jatqanyn gúl tere júrip kózimiz shalatyn. Bul sol kezdegi Saratov oblysynyń gýbernatory Dmıtrıı Aıaskov ekenin keıinnen bildik. Qyrdyń qyzyl qyzǵaldaǵy kórshiles Reseıdiń óńir basshysyn da qyzyqtyrǵanyna osylaısha kýá bolyp edik, dep eske alady Baıan esimdi qurbymyz.
Qońyrbas degen sabaǵynyń dánderi bar qunarly shóp bolady. Taptyra bermeıtin mal azyǵy. Qońyrbas bolsa malǵa jemniń de qajeti bolmaı qalady. О́ıtkeni, onyń jemi de ózinde, dáni de ózinde. Munyń da ǵumyry ólsheýli. Ýaqytynda shaýyp, oryp almasań, sabaǵy da, dánderi de qaraıyp qýrap ketedi. Bıyl Oral óńirinde qońyrbas ta bitik shyqty. Kúzdik egis te kózdiń jaýyn alǵandaı. Qazirdiń ózinde bıiktiginen attyly adamnyń keýdesi ǵana kórinedi. Ala-qulasy joq birdeı ósken. Tep-tegis jaıqalyp terbelip tur. Bul bıylǵy jyldyń berekesiniń basy bolsa ıgi. Sirá, osy oń qubylystardyń bári jerdegi ylǵaldyń moldyǵynan, ótken kúzdegi ári bıylǵy kóktemdegi tolassyz jaýǵan jańbyrlar jerdiń ıin qandyryp jaýǵandyǵynan jáne kóktem aılarynda kúnniń kúrt ysyp ketpegendiginen paıda bolǵany haq.
Jalpy, salqyn jaz degen uǵym – sol jyldyń egini mol, bitik ári qalyń shyǵatynynan habar bere alady. Salqyn jazdyń ortasha temperatýrasy 25-30 gradýstan asa qoımaıdy. Bul astyqtyń qalypty ósýi úshin óte qolaıly temperatýra. Eń bastysy, táýekeldik jaǵdaıyna beıimdelgen egistik kúıip ketpeıdi. Sondyqtan, onyń dánderi de badanadaı bolady deıdi mamandar. Munyń ózi ár jyl saıyn salǵan egistikteri shilińgir shildeniń 40-45 gradýs ystyǵyna shydaı almaı kúıip ketip júrgen batysqazaqstandyq astyq ósirýshiler úshin qolaıly kezeń emes pe?
Bıylǵy jyl – kibise jyl. Iаǵnı, ádettegi jyldardan bul jyldyń bir kúni artyq. Soǵan saı aqpan aıy 29 sanymen aıaqtalady. Ádette, kibise jyly qurǵaqshylyq oryn alyp, qolaısyzdyq bolady degen uǵym men túsinik qalyptasqan halyqtyń arasynda. Al bıylǵy jyldyń qazirgi qarqynyna qaraǵanda, qarapaıym turǵyndar arasynda ornyqqan bul túsiniktiń shyndyqqa sáıkes kele bermeıtinin kóremiz. Laıym da solaı bolǵaı.
Temir QUSAIYN,
«Egemen Qazaqstan»
Batys Qazaqstan oblysy