Keshe Erevanda UQShU-ǵa múshe memleketter Qaýipsizdik keńesteri hatshylary komıtetiniń kezekti májilisi bolyp ótti. Oǵan Qazaqstan Respýblıkasy Qaýipsizdik Keńesi hatshysynyń birinshi orynbasary Marat Shaıhýtdınov qatysty.
Bul jolǵy májilis ústimizdegi jyldyń kúzinde UQShU-ǵa múshe elder memleket basshylarynyń qatysýymen ótetin Ujymdyq qaýipsizdik keńesiniń kezekti sessııasyna daıyndyq kezeńderiniń biri boldy.
Sharaǵa qatysýshylar 2015 jyldyń 21 jeltoqsanynda Máskeýde Ujymdyq qaýipsizdik keńesi tarapynan berilgen tapsyrmalardyń oryndalý barysyn qarastyrdy.
UQShU-nyń 2025 jylǵa deıingi kezeńge arnalǵan Ujymdyq qaýipsizdik strategııasynyń jobasy boıynsha pikir almasýlar ótti.
Delegasııalar basshylary, sondaı-aq, halyqaralyq terrorızm men dinı ekstremızmge qarsy birlesip is-qımyl tanytý máselelerin, Jedel jaýap beretin ujymdyq kúshterdi ári qaraı damytýdy qosa alǵanda, UQShU-ǵa múshe elderdiń áskerı yntymaqtastyǵynyń jekelegen baǵyttaryn talqylady.
Májilis qorytyndysy boıynsha qaýipsizdik keńesteriniń hatshylary UQShU-ǵa múshe memleketter jaýapty organdarynyń ózara is-qımylyn jetildirýge baǵyttalǵan birqatar sheshimderge qol qoıdy.
Delegasııalar basshylary Armenııa Respýblıkasynyń Prezıdenti S.Sargsıannyń qabyldaýynda boldy.
«Egemen-aqparat»