Qaraǵandy oblysynda 3 myńnan astam adam «Máńgilik El» patrıottyq aktisine arnalǵan shara aıasynda jalpyqazaqstandyq dıktant jazdy.
Sharany uıymdastyrýshylardyń aıtýynsha, memlekettik tilde dıktant jazý oblystyń toǵyz qalasy men toǵyz aýdanynda bir mezette qolǵa alynǵan. Dıktanttyń 230 tańba belgisinen turatyn mátini Qazaqstan halqy Assambleıasynyń HHIV sessııasynda qabyldanǵan «Máńgilik El» patrıottyq aktisi týraly taqyrypty qamtyǵan.
Qaraǵandydaǵy N.Gogol atyndaǵy oblystyq ǵylymı kitaphanada ótken aksııa qatysýshylary aldynda oblys ákimi apparaty janyndaǵy «Qoǵamdyq kelisim» mekemesiniń basshysy Tileýbek Kámalıev sóz sóılep, sáttilik tiledi.
– «Máńgilik El» patrıottyq aktisiniń negizinde árbir qazaqstandyq úshin qarapaıym Hám mańyzdy qundylyqtar jatyr. Olar – otbasynyń berekesi, turaqtylyq, qaýipsizdik, birlik jáne erteńgi kúnge degen senimdilik. Dál qazir sizder úshin memlekettik tildi qanshalyqty meńgergendikterińizdi jáne de jeke saýattylyqtaryńyzdy tekserip alýǵa degen tamasha múmkindik týyndap otyr. Barlyqtaryńyzǵa azamattyq belsendilikterińiz ben ómirlik ustanymdaryńyz úshin alǵys aıtqym keledi!», – dedi ol.
Atalǵan kitaphanada dıktant jazý úshin etnomádenı birlestikterdiń ókilderi, memlekettik qyzmetshiler, jastar men zeınetkerler jıylǵan bolatyn. Jazylǵan dıktanttardy arnaıy qurylǵan jumys komıssııasy tekserdi.
«Bul aksııa, sóz joq, memlekettik tildiń bedelin kóterip qana qoımaı, «Máńgilik El» patrıottyq aktisiniń ustanymdaryn dáripteýge de jol ashady», – deıdi N. Gogol atyndaǵy kitaphananyń dırektory Dına Amanjolova.
Aksııany uıymdastyrýshylar habarlaǵandaı, Qaraǵandy oblysynda jalpyqazaqstandyq dıktantty 3479 adam jazdy. Nátıjesinde qatysýshylardyń 30 paıyzy «óte jaqsy» degen baǵaǵa qol jetkizse, 44 paıyzynyń jumysy «jaqsyǵa» baǵalandy. Sonymen qatar, úzdik jumystardyń avtorlary alǵys hattarmen marapattaldy.
Qaırat ÁBILDINOV,
«Egemen Qazaqstan»
QARAǴANDY