Qyzylorda qalalyq máslıhatynyń sońǵy eki shaqyrylymyndaǵy depýtaty, oblystyq kásipkerler palatasynyń tóraǵasy, «Akvalaın» seriktestiginiń bas dırektory Ǵalymbek Jaqsylyqov osyndaı dárejege qalaı jetti? Qarapaıym ǵana otbasydan shyǵyp, otyzynda orda buzyp, jurt qyzyǵarlyqtaı jetistikke jetken jigittiń tabys formýlasy qandaı?
Toqshylyq kep, 90-jyldardaǵy toqyraýdy umytyp ketkendeımiz ǵoı qazir. Áıtpese, sol kezderi isherge as, kıerge kıim tappaı qınalǵandardyń kóp bolǵany shyndyq. Ǵalymbektiń bozbala shaǵy sol ýaqytqa sáıkes keldi. Stýdent edi. Úıelmeli-súıelmeli shańyraqtyń shyǵyny da az emes-tin. Sondyqtan ata-anasyna salmaq salmaı, óz betinshe jetilýdi jastaıynan oılady. Eń aldymen óziniń kúndelikti shyǵynyn esepteıtin dápter arnady. Kún saıyn qansha tıyn jaratqanyna deıin jazyp otyrdy. Solaısha, aılyq shyǵynyn eseptep shyǵardy da, solardyń arasynan maqsatsyz jumsalǵan qarjyny tapty. Kelesi aıda ondaı artyq aqsha jumsalmaıtyn boldy. Dál sol shaqta Qyzylordadan «Temirhan TV» degen jekemenshik arna ashyldy. Jas jigit telearna basshylyǵyna óziniń baǵdarlamasyn usyndy. Jýrnalıstıkanyń aýylynan alys bolsa da, Ǵalymbektiń talaby unap, qabyldandy. Sóıtip, ol «Temirhan TV» arnasynda qylmys hronıkasyn júrgize bastady. Operatoryn ertip alyp qalada oryn alǵan qylmystyq oqıǵalardyń basynda júrdi. Jalaqysy kóp bolmasa da, óziniń qajetin óteıtin. Biraq telearna eki-aq jyl jumys istedi. Sosyn jabylyp qaldy. Endi ne isteý kerek? Ári-beri yńǵaıly jumys izdep kórip edi, reti kelmedi. Aqyry, kondýktorlyq jumys tapty.
Keshe ǵana telearnada eldiń aldyna shyǵyp júrgen jigit búgin bılet kesip otyrdy. Biraq oǵan arlanǵan joq. «Adal eńbek, mańdaı terimmen tapqan tabysym úshin uıalýym kerek pe?» deıdi ózi.
Oqý bitirer jyly darııanyń boıynan alaqandaı jerdi jalǵa alyp, demalýshylar úshin káýap satpaq oı týdy. Oıǵa alǵanyn júzege asyrýdy jastaıynan ádet qylǵan Ǵalymbek birden iske kirisip ketti. Sóıtse, káýaptyń qalaı jasalatynyn da bilmeıdi eken. Bir dosyna ótinish aıtady. Túnimen ekeýi etti buqtyryp, tuzdap, daıyndaıdy. Tańerteń jaǵajaıǵa baryp, ettiń betin ashyp qalsa... sasyp ketipti.
Amal joq, káýaptyń qyr-syryn biletin adam jaldap, ózi sodan úırenip, jumysyn bastaıdy. Degenmen, sol jyly kúnniń kózi ashylmaı, demalýshylar az bolyp, jumysy júrmeıdi. Tabandylyǵy sol, paıda tappasa da qarakúzge deıin jaǵajaıdaǵy jumysyn jalǵastyra beredi.
Kásipkerliktiń dámin tatqan jigit ózi turatyn Qyzyljarma aýylynan shaǵyn dúken ashady. Eń alǵash bazarǵa baryp 500 teńgege qurt, shokoladtar men saǵyz satyp ákeledi. Eki-úsh aıdan keıin 800 teńgege zat alatyn boldy. Odan aınalymy 1000 teńgege jetti. Al 1200 teńgege saýda jasaǵanynda ózin shyn baqytty sezindi. Sonyń ózin úlken jetistik sanap, shúkirshilik qylǵanyn áli kúnge umytpaıdy.
Qazir ózi basqaratyn «Akvalaın» JShS-inde elýden asa adam jumys isteıdi. Al mekeme tutastaı Qyzylorda qalasyn taza aýyzsýmen qamtamasyz etip otyr desek te bolady.
Ǵalymbektiń taýyspaǵan oqýy joq. Bızneske qajetti bilimniń bárin jıǵan. О́zi karateden qara belbeý ıegeri. Jattyqtyrýshylyqpen de aınalysty. Shákirtteri oblystyq, respýblıkalyq, halyqaralyq jarystardan júldemen oraldy. Qysqasy, besaspap jigit. Bilimdi, bilikti, kásipker, jomart azamattyń ómir joly óskeleń urpaqqa úlgi bolarlyqtaı dep oılaımyz.
Erjan BAITILES,
«Egemen Qazaqstan»
QYZYLORDA