Kórnekti jazýshy, dramatýrg, synshy, Memlekettik syılyqtyń laýreaty Sábıt Dosanovqa «Túrik álemine sińirgen asa zor eńbegi úshin» berilgen Mahmud Qashqarı atyndaǵy halyqaralyq syılyqty tapsyrý saltanatyna arnalǵan ádebı kesh ál-Farabı atyndaǵy Qazaq ulttyq ýnıversıteti kitaphanasynyń úlken konferens-zalynda ótti.
Basqosýdy ýnıversıtet rektory Ǵalymqaıyr Mutanov ashyp, júrgizip otyrdy. Ázerbaıjan jazýshysy, «Shynar» jýrnalynyń bas redaktory, Qashqarı atyndaǵy qordyń tóraǵasy Elhan Zal Mahmud Qashqarı syılyǵyn Sábıt Dosanovqa saltanatty túrde tapsyrdy. «Sábıt Dosanov bul syılyqty kórkem prozadaǵy alǵashqy týyndysy «Aq arýana» povesi úshin alyp otyr. Osy ýaqytqa deıin bul eńbek orys, fransýz, ózbek, qyrǵyz, ázerbaıjan, túrik, t. b. tilderge aýdarylyp, alys-jaqyn elderden laıyqty baǵasyn alyp úlgerdi» dedi ol.
Almaty qalasy ákimdiginiń ishki saıasat basqarmasynyń basshysy Nurlan Sydyqov qala ákimi Baýyrjan Baıbektiń arnaıy quttyqtaýyn jetkizdi.
Jıyn barysynda Sábıt Dosanovqa «QazUÝ-ǵa 80 jyl» altyn medali tabys etildi. Sonymen qatar, shyǵarmashylyq keshte Qazaqstan Jazýshylar odaǵy basqarma tóraǵasynyń birinshi orynbasary Ǵalym Jaılybaı, jazýshy, Memlekettik syılyqtyń laýreaty Dýlat Isabekov, Máskeý qalasyndaǵy qazaq mádenı avtonomııasynyń quttyqtaýyn alyp kelgen Jarqyn Qońyrbaıqyzy kesh ıesine aqjarma tilekterin aıtty.
Qazaqstannyń eńbek sińirgen qaıratkeri, kúıshi-kompozıtor Shámil Ábiltaı qalamgerge arnaǵan «Sábeń sal» atty ánin tamyljyta shyrqasa, aqsaqal satırık Myńbaı Rásh Sábıt Dosanovqa arnaǵan «Tektiler toǵysýy» atty qııaldyq elegııasyn, sondaı-aq, aqyn Myrzan Kenjebaı arnaý óleńin oqydy.
Jıynda sóz alǵan kesh ıesi, belgili qalamger, professor Sábıt Dosanov: «Men bul ýnıversıtettiń 1964 jylǵy túlegi bolamyn. Bylaısha aıtqanda, ata-anam sekildi. Endeshe, bul oqý ornynda bolǵan ádebı kesh men úshin úlken qurmet», dep otyrǵan jastarǵa jalpy kópshilikke ataly sóz arnady.
«Egemen-aqparat»