El táýelsizdiginiń 25 jyldyǵy jáne Astana kúni qurmetine arnalǵan «Azattyq aıasynda» atty respýblıkalyq jyr músháırasy óz máresine jetti. Astana qalasy ákimdiginiń qoldaýymen Sáken Seıfýllın murajaıy osymen altynshy ret ótkizip otyrǵan dástúrli jyr dodasyna bıyl júzge jýyq úmitker qatysty.
Táýelsizdikti ár qyrynan tolǵaǵan óleń-dastandar aqyndardyń bul keleli taqyrypty kesteli jyrmen órnekteý jolynda kóp izdengenderin baıqatty. Ásirese, semeılik Medet Bojan, qaraǵandylyq Áset Amanjolov sekildi jańa esimderdiń kórinýi qýanyshty. Músháıraǵa táýelsizdik tarıhyn túpten tartyp jyrlaǵan dastandar da kóptep túskenin aıta ketkimiz keledi. Alaıda, jas aqyn Oljas Qasymnyń «Ǵasyr qasireti» dastany ǵana qazylar alqasynyń kóńilinen shyqty.
Báıgege túsken shyǵarmalardy talǵam súzgisinen ótkize kele Memlekettik syılyqtyń laýreaty, jazýshy Qajyǵalı Muhambetqalıev tóraǵalyq etken qazylar alqasynyń sheshimimen birinshi báıge – «Astanamen syrlasý» óleńi úshin belgili qalamger Ádilbek Ybyraıymulyna berildi. Ekinshi eki oryndy «Nurly kósh» óleńi úshin Dúken Másimhanuly jáne «Berdiǵoja bahadúr» óleńi úshin Dáýletkereı Kápuly ıelendi. Úshinshi oryndardy «Astana» jyry úshin aqtóbelik Baýyrjan Babajanuly, «Tańǵy tilek» óleńi úshin almatylyq Nurolla Saǵatbaev, «Máńgilik El – máńgilik murat» óleńi úshin qaraǵandylyq Áset Amanjolov sııaqty aqyndar bólisti. Sondaı-aq, yntalandyrý syılyqtary «Týǵan el» óleńi úshin Nurlan Qalqaǵa, «Ǵasyr qasireti» dastany úshin astanalyq jas aqyn Oljas Qasymǵa, «Bostandyq» óleńi úshin astanalyq jas aqyn Erbol Alshynbaıǵa, «Azattyq pen Elbasy» óleńi úshin Medet Bojanǵa, «Bul – qazaq» óleńi úshin semeılik jas aqyn Arman Sherızatqa berildi. Sáken Seıfýllın murajaıy taǵaıyndaǵan arnaıy syılyqty «Qazaq jeri» óleńi úshin astanalyq Esengeldi Súıinov qanjyǵasyna baılady.
Júldegerlerdi marapattaý 1 shilde kúni Astanada «Jastar» saraıynda ótedi.
Serikhan SABYRBEKOV,
Qazylar alqasynyń jaýapty hatshysy
ASTANA