Premer-Mınıstr Kárim Másimov Úkimet janyndaǵy Ekonomıkalyq saıasat jónindegi keńestiń otyrysyn ótkizdi, dep habarlady Premer-Mınıstrdiń baspasóz qyzmeti.
Keńes músheleri memlekettiń qatysýyndaǵy kompanııalardy qor rynogyna shyǵarý jáne el turǵyndary men jınaqtaýshy zeınetaqy qorlary qarjylaryn qor rynogynyń mehanızmi arqyly ulttyq kompanııalardyń aksıonerlik kapıtalyna shyǵarý máselelerin qarady.
Sol sııaqty K.Másimov otandyq kásiporyndardyń básekege qabilettiligi jáne eńbek ónimdiligin arttyrý máselesi boıynsha da jumys babyndaǵy keńes ótkizdi.
Sondaı-aq Úkimet basshysynyń tóraǵalyǵymen Ekonomıkany modernızasııalaý máseleleri jónindegi memlekettik komıssııanyń da otyrysy ótti. Onda «Bıznestiń jol kartasy-2020» baǵdarlamasynyń ekinshi baǵyty – «Kásipkerlik sektordy saýyqtyrý» máselesi sheńberindegi usynystar talqylandy.