О́tken sársenbide Aqtóbe oblystyq sotynyń ǵımaratynda Joǵarǵy Sot Tóraǵasy Qaırat Mámıdiń, óńir basshysy Berdibek Saparbaevtyń qatysýymen ótken keńeıtilgen keńeste oblystyq sottyń jańa tóraǵasy tanystyryldy. Is-sharaǵa Aqtóbe jáne Soltústik Qazaqstan oblystyq sottarynyń tóraǵalary, oblys aktıvi, óńir sýdıalary, Sýdıalar odaǵy fılıaly men Sottar ákimshisiniń basshylary qatysty.
Keńeste sóz alǵan Qaırat Mámı zańǵa sáıkes Erlan Aıtjanovtyń oblystyq sot tóraǵasy laýazymyndaǵy bes jyldyq merziminiń aıaqtalǵandyǵyn jáne ústimizdegi jylǵy 20 maýsymdaǵy Prezıdent Jarlyǵymen oblystyq sottyń tóraǵasy qyzmetine Muratqalı Áketaıdyń taǵaıyndalǵanyn málimdedi.
Joǵarǵy Sot Tóraǵasy jańadan taǵaıyndalǵan oblystyq sottyń tóraǵasyn bilimdi zańger ári bilikti basshy retinde tanystyrdy. M.Áketaıdyń oblys prokýrorynyń orynbasary, oblystyq sottyń alqa tóraǵasy jáne Soltústik Qazaqstan oblystyq sotynyń tóraǵasy laýazymdaryndaǵy jumystary atalyp ótildi.
Q.Mámı oblystyń sot júıesin damytýǵa qosqan úlesi úshin E.Aıtjanovqa alǵys bildirdi. Memleket basshysynyń Jarlyǵymen ol Soltústik Qazaqstan oblystyq sotynyń tóraǵasy bolyp taǵaıyndaldy. Keńes aıasynda oblys sottary qyzmetiniń, Sot ádebi jónindegi komıssııanyń jáne Sýdıalar odaǵy fılıalynyń ústimizdegi jylǵy 5 aıdaǵy jumysynyń qorytyndylary talqylandy.
Joǵarǵy Sot Tóraǵasy «100 naqty qadam» Ult Josparynda kózdelgen sharalardy iske asyrý aıasynda elimizdiń sot júıesine engizilgen jańalyqtar týraly aıtyp ótti. Atap aıtqanda, sot tóreligi úsh býyndy júıege kóshti. Joǵarǵy Sottyń janynda ınvestısııalyq daýlardy qaraıtyn mamandandyrylǵan alqa men halyqaralyq keńes quryldy. Azamattyq sot isine prokýrordyń qatysýy shekteldi. Biliktilik talaptary men sýdıalyq laýazymǵa kandıdattardy irikteý tetikteri, psıhologııalyq testileýdiń róli kúsheıtildi, polıgrafologııalyq zertteý engizildi. Joǵary Sot Keńesi derbes apparaty bar avtonomdy memlekettik mekeme retinde túbegeıli qaıta quryldy, Joǵarǵy Sot janyndaǵy Sot tóreligi akademııasy óz jumysyn jańa mártebede bastady.
Sottarda aýdıo-beıne tirkeý júıesin engizý men qoldaný boıynsha belsendi jumys júrgizildi. Q.Mámı ústimizdegi jyldyń kúzinde sýdıalardyń sezinde qabyldanady dep josparlanyp otyrǵan jańa Ádep kodeksi jobasynyń ázirlengendigin aıtty. Kodeks jobasy respýblıkanyń sýdıalar qaýymdastyǵymen kelisildi jáne Joǵarǵy Sot janyndaǵy halyqaralyq keńestiń otyrysynda maquldandy. Ol boıynsha Eýropalyq Keńestiń Venesııalyq komıssııasy sarapshylarynyń qorytyndysy alyndy.
Tóraǵa barlyq mańyzdy memlekettik mekemelerdi qorǵaýdy kúsheıtýge, olardy qaraýdyń zamanaýı quraldarymen, sapaly beınebaqylaý júıesimen jaraqtandyrý qajettigine nazar aýdardy. Osy rette atalǵan sharalar azamattar úshin yńǵaısyzdyq týǵyzbaýy tıistigi atap ótildi.
– Sýdıalar men sottar apparattary qyzmetkerleriniń arasynda túsindirý jumysyn júrgizý kerek. Árıne, mundaı jumysty proseske qatysýshylarmen de júrgizý qajet. Osy baǵyttaǵy ereje BAQ-ta keńinen jarııalandy. Olardy bilý kerek jáne quqyq qorǵaý organdary men arnaıy qyzmet qyzmetkerleriniń osy jaǵdaıdaǵy talaptaryna túsinistikpen qaraý kerek, – dedi ol.
Satybaldy SÁÝIRBAI,
«Egemen Qazaqstan»
Keńeste oblys ákimi B.Saparbaev, jańadan taǵaıyndalǵan oblystyq sottardyń tóraǵalary, sýdıalar qaýymdastyǵynyń ókilderi sóz sóıledi, bul baǵyttaǵy óz oılaryn ortaǵa saldy.
AQTО́BE