Almatydaǵy Qazaq ulttyq agrarlyq ýnıversıtetinde Qazaqstan Respýblıkasynyń Memlekettik hatshysy Gúlshara Ábdiqalyqovanyń qatysýymen TMD-nyń jetekshi agrarlyq joǵary oqý oryndary rektorlary keńesiniń qorytyndy otyrysy ótti.
Keńes jumysyna Táýelsiz Memleketter Dostastyǵy aımaǵynyń 10 elinen kelgen 30-dan asa joǵary oqý oryndarynyń rektorlary, Qazaqstan Respýblıkasy Aýyl sharýashylyǵy mınıstrliginiń jáne «Ulttyq agrarlyq ǵylymı-bilim berý ortalyǵy» kommersııalyq emes aksıonerlik qoǵamynyń ókilderi, Qazaqstannyń jetekshi agrarlyq joǵary oqý oryndarynyń rektorlary, ǵylymı-zertteý ınstıtýttarynyń dırektorlary, eksperımentaldyq-tájirıbelik sharýashylyqtardyń jáne aýylsharýashylyq ónimderin óndirýmen aınalysatyn kásipkerler qatysty.
Keleli keńes «Agrarlyq bilimniń TMD keńistiginde jańǵyrýy» taqyrybynda ótti. Atap aıtqanda, jańa agrarlyq mamandyqtardy ashý jáne birlesken bilim berý baǵdarlamalaryn ázirleý boıynsha jumystardy uıymdastyrý, agroónerkásiptik keshende jańa tehnologııalardy ázirleý jáne taratýdyń zamanaýı, tıimdi jáne básekege qabiletti júıesin qurý, álemdik bilim berý keńistigine ıntegrasııalaný sekildi búgingi tańda asa mańyzdy máseleler talqylandy.
Memlekettik hatshy óziniń kirispe sózinde Elbasy Nursultan Nazarbaevtyń «Qazaqstan-2050» Strategııasy: qalyptasqan memlekettiń jańa saıası baǵyty» atty Joldaýynda HHI ǵasyrdyń jahandyq 10 syn-qateri qataryna jahandyq azyq-túlik qaýipsizdigine tónetin qater jatatyndyǵyn aıtqandyǵyn jetkizdi. Sondyqtan, ulttyq qaýipsizdiktiń quramdas bóligi retinde azyq-túlik qaýipsizdigin qamtamasyz etý Qazaqstannyń táýelsiz memleket retinde damýynyń basty sharty bolyp tabylady.
TMD elderiniń agroónerkásiptik kesheniniń ınnovasııalyq damýynda ǵylymı ázirlemeler men zertteýlerge úlken mán beriledi. Bul jerde 2003 jyly qurylǵan TMD agrarlyq joǵary oqý oryndary rektorlary keńesiniń mańyzy zor. Atalǵan keńes kadrlardyń kásibı biliktiligin arttyrý jáne olardy qaıta daıyndaý, TMD-nyń jetekshi agrarlyq joǵary oqý oryndary oqý-ádistemelik birlestikteriniń ózara qarym-qatynasyn jáne basqa da halyqaralyq uıymdarmen baılanys ornatý arqyly joǵary oqý oryndarynyń ózara yntymaqtastyǵyn uıymdastyrý aýmaǵyndaǵy jumystardy retteıdi.
Agrarlyq joǵary oqý oryndarynyń basshylary joǵary oqý ornyn ulttyq zertteý ýnıversıtetine transformasııalaý, agrarlyq ónerkásip salasynda ǵylym, bilim jáne óndiris ıntegrasııasy mehanızmderin damytý, memlekettik-jekemenshik áriptestigin damytý jáne taǵy da basqa mańyzdy máseleler turǵysynda tájirıbelerimen almasty.
G.Ábdiqalyqova keńes barysynda aýyl sharýashylyǵyndaǵy jańa tehnologııalardy damytý men almastyrý úshin nysanaly izdenispen aınalysatyn ýnıversıtet janynan qurylǵan Agrotehnıkalyq habty basqarýdyń uıymdastyrýshylyq qurylymymen tanysty. Aýyl sharýashylyǵy ǵylymynyń teorııasy men tájirıbesi arasyndaǵy baılanystyrýshy býyn retinde tanylǵan mundaı habtar búgingi tańda AQSh, Argentına, Brazılııa, Izraıl jáne Avstralııa elderinde tabysty jumys istep tur. Sonymen qatar, Memlekettik hatshy ushqyshsyz ushatyn apparattar – drondarmen aýyl sharýashylyǵy alqaptaryn aldyn ala tekserýmen aınalysatyn Turaqty egin sharýashylyǵy ortalyǵynyń ashylý saltanatyna qatysty.
Qanat ESKENDIR,
«Egemen Qazaqstan»
ALMATY