Naızaǵaıdan shopan otarynan 300-ge jýyq qoı opat boldy
Qyrǵyzstandaǵy Turmush.kg basylymynyń habarlaýynsha, Djalal-Abad oblysy, Aqsyı aýdanynda naızaǵaı soǵýdyń saldarynan 300-ge jýyq qoı qyrylyp qalǵan.
Atalǵan basylymnyń aqparatyna súıensek, shopan 600 bas ýaq maldy Kashka Sýý jaıylymyna jetkizýi kerek bolypty. Alaıda, ol dittegen jerine jete almaı, qoılardy Sýýk-Dobo asýyna ákep ıirgen. Mine, sol-aq eken, aýa raıy tez buzylyp, dúleı daýyl turyp ketken. Sonyń saldarynan shelektep jańbyr quıyp, naızaǵaı oınaǵan.
– Kashka Sýý jaıylymyna jetý úshin kemi eki kún júresiń. Jolaı úlken asýdan ótý kerek. Al osy beleske taıaǵanda aýa raıy qubyldy. Men eki kómekshime shatyr qurýdy tapsyrdym. Qoılardy bir jerge jınadyq. Sol kezde naızaǵaı maldarǵa tústi. Saldarynan 120 bas qoı qyryldy, – deıdi shopan. Al kýágerlerdiń aıtýynsha, munan bólek, 145 bas mal aspannyń kúrkireýi men naızaǵaıdyń oınaýynan qorqyp, asýdan sekirip ketken. Keıin malshy 115 qoıdyń óli denesin taýyp alǵan.
Aıta keteıik, mal Tash-Kýmyr qalasy men Aqsyı aýdanynyń fermerleriniki eken. Osy oraıda mal ıeleri shopanǵa eshbir kiná artpaıtynyn, qunyn tóletpeıtinin jetkizipti.
Talǵat RAIYMBEK,
«Egemen Qazaqstan»