Kúni keshege deıin shetelden tasymaldanyp kelgen lımon Ońtústik jurty úshin tańsyq bolýdan qaldy. Saryaǵash, Saıram dıqandary ósirip kelgen sıtrýsti jemis búginde taýly aýdan sanalatyn Qazyǵurtta da jersine bastady.
Qazyǵurt aýdany, Qaqpaq aýylynyń turǵyny Ospanáli Taqsyqbaev jylyjaıǵa otyrǵyzǵan 640 túp lımon aǵashynyń árqaısysynan 17-18 kılo aralyǵynda jemis jınap aldy.
Asa myqty dárýmender qataryna jatqyzylatyn lımonnyń baǵasy da kóńildegideı. Dıqan jınap alǵan on bir tonna lımonnan túsken tabys ony qanattandyryp, jylyjaı kólemin taǵy da arttyrýǵa bel baılatyp otyr.
Saryaǵashtaǵy tájik orta mektebiniń dırektory ekken lımon týraly gazetimizde burynyraqta jazǵan edik. Áýelde qan qysymyn tómendetý maqsatynda ekken otbasy lımonnyń úlken paıda kózi ekendigine kóz jetken. Búginde olardyń ónimin jyl saıyn Reseı kásipkerleri kóterme baǵamen alyp ketedi.
Osylaısha, lımon jemisi ashy bolǵanymen, tabysy tátti bolyp tur.
Baqtııar TAIJAN,
«Egemen Qazaqstan»
Ońtústik Qazaqstan oblysy