Astanadaǵy Ulttyq akademııalyq kitaphanada «Amanat» ıntellektýaldyq pikirsaıys klýbynyń uıymdastyrýymen «Alash aıtqan asyl sóz» atty kitaptyń betashar rásimi boldy.
Qazaqstan Táýelsizdiginiń – 25, Alashorda úkimetiniń 150 jyldyǵyna arnalǵan aıtýly jobanyń avtory, Memlekettik «Daryn» syılyǵynyń laýreaty Berik Ýálı rýhanı sharaǵa jınalǵan zııaly qaýym ókilderine óziniń rızashylyǵyn bildirip, jýrnalıst Serik Joldasbaı tarıhshy Erkin Erlanuly sekildi ultjandy serikterimen birlesip atqarǵan irgeli isteriniń barysyn baıandap berdi.
– Alash qaıratkerleriniń artynda qalǵan asyl sózderdi jınaqtaýdy arnaıy qolǵa aldyq. Árıne, olardyń aýzynan shyqqan aqyl-naqyldardyń bárin birdeı kózinen tizip, kógendeı almaǵanymyz anyq. Áıtse de qolda bar qordy qaıta bir qarap, tuǵyry bıik tulǵalarymyzdyń eldik máselelerdi ekshegen máıekti pikirlerin usynýǵa tyrystyq, – dedi ol otyrǵandarǵa oı tastap.
Alǵashqylardyń biri bolyp sóz alǵan jazýshy-ǵalym Tursyn Jurtbaı bizdiń keıbir atqaminer azamattarymyz úlken minbelerden sóılegende dáıeksózderdi kóbinese sheteldik saıasat serkeleriniń eńbekterinen keltiretinin, al ultty uıytar uly oılar keshegi Alash kemeńgerleriniń shyǵarmalarynda tunyp turǵanyn esterine ala bermeıtinderine qynjylatynyn aıtty.
Fılologııa ǵylymdarynyń doktory Namazaly Omashev bolsa, Álıhan Bókeıhanuly, Ahmet Baıtursynuly, Mirjaqyp Dýlatuly bastaǵan jaqsylarymyz ben jaısańdarymyz qoldaryna qalam ustaǵanda eń aldymen halqynyń qajetine jarar dúnıelerdi jazǵanyn, sondyqtan da olardyń aıtqandary ýaqyt ýytyna boı aldyrmaıtynyn atap ótti.
Belgili til mamany, professor Sherýbaı Qurmanbaıuly el-jurtyna jan-júregimen qyzmet etýdiń úlgisin kórsetken asyl aǵalarymyzdyń aforızmderi oqyrman oljasyna aınalǵanyn jaqsylyq joralǵysyna balap, onyń endigi jerde óreli órenderimizdiń ústelústi kitaby bolatynynan úmittenetinin jetkizdi.
Kitapqa uzyn-yrǵasy 25 Alash qaıratkeriniń kúni búginge deıin mánin joımaǵan maqal-mátelge bergisiz esti sózderi engizilipti. Olardy oqı otyryp, siz ben bizdiń de oı-órisimiz biraz bıikterdi sharlap qaıtaryna esh kúmánińiz bolmasyn.
Talǵat BATYRHAN,
«Egemen Qazaqstan»