Búginde áleýmettik jelilerdi aıaldamada úıezdep turǵan bir úıir jylqynyń sýreti kezip júr. Bir qaraǵanda, munyńyz – saparlarǵa jıi shyǵyp júrgen qazaqstandyqtardyń kúndelikti ómirde jıi kýá bolyp júrgen kórinisteriniń biri ǵana. Degenmen, másele bul sýretti kimniń túsirip, jelige júktegeninde bolyp tur.
Baqsaq, bul sýrettiń avtory Ulybrıtanııanyń Qazaqstandaǵy Tótenshe jáne ókiletti elshisi Kerolın Braýn eken. Jalpy, jeke blog júrgizip, onda óziniń oqyrmandaryna qazaq tilinde ún qatyp otyrý elshi hanymnyń súıikti isteriniń biri bolsa kerek. Sonymen qatar, resmı tulǵa blogqa beınekórinister men fotosýretter salyp, bizdiń el týraly óziniń kórip-bilgenderin jazyp otyrýdy da ádetke aınaldyrǵan.
Taıaýda Kerolın Braýn Arqanyń ushqan qustyń qanaty talatyn dalasyn kókteı ótetin kúrejoldyń boıyndaǵy avtobýs aıaldamasynda kóleńkelep turǵan jylqylardy fotoǵa túsirip alyp, facebook áleýmettik jelisinde bizdiń eldegi Ulybrıtanııa dıplomatııalyq ókildiginiń resmı akkaýntyna jarııalaǵan. Elshi hanym sýrettiń astyna «Avtobýs kútken «arǵymaqtar» dep ázildeı at qoıyp, jazba qaldyrypty.
Jeli qoldanýshylar bul sýrettegi aıaldamany birden tanyǵan. Ol – Ulytaý aýdanyndaǵy Jezdi eldi mekenine kireberistegi avtobýs aıaldamasy eken. Internetti kezip ketken sýretke qazaqstandyqtar ǵana emes, ulybrıtanııalyq azamattar da pikir bildirip, elshi hanymnyń áziline qaljyńmen ún qosqan.
Qaırat ÁBILDINOV,
«Egemen Qazaqstan»
QARAǴANDY