Sheraǵańnyń ýytty sol bir sózi-aı...

Jer planetasy 2-shi myń­jyl­dyq­­ty, ıaǵnı kezekti mıllenıýmdy dú­­rildetip qarsy alýǵa daıyn­da­lyp jatqan. 1999 jyldyń kúzi edi... AQSh Memlekettik hatshy­sy­nyń ózi tóte basshylyq jasaıtyn Halyqaralyq damý jónindegi agenttik (USAID) Máskeý shaha­ryn­da BAQ quraldary ókilderimen álemdik dárejedegi bir ǵajap kásibı syrlasý – semınar-trenıng ótkizdi. Oǵan burynǵy odaq­tas respýblıkalar arasynan Túrik­menstan, Moldova men Baltyq jaǵalaýy memleketterinen basqa barlyq respýblıkalar ókilderi qatysty. Bas moderator – semınar-trenıngke shyǵarmashylyq turǵydan «tuzdyq» bolýy úshin, jıynǵa qatysýshy ár respýblıkadan tanymal qoǵam-memleket qaıratkerleriniń qazirgi BAQ týraly aıtqan bir-bir aýyz qanatty sózi qajet degen ótinish aıtypty. «Egemenniń» 5-qabatynda (Al­maty) arqaly aqyn Aıan aǵa (Nysanalın) ekeýi úndiniń shı qa­mysynyń tútinin baıaý bur­qyratyp qoıyp, áńgimelesip otyrǵan sátinde Sheraǵanyń aýzy­nan beınekameraǵa jazyp alǵan bir oıly sóz esime sap ete tústi. «Búgingi BAQ-tyń kúsh-qýatynyń ólshemi jerdiń tininde orasan tektonıkalyq jarylys jasaıtyn zilzaladan da, jalyny alapat órtten de, jolyndaǵysyn jaıpap ótetin tasqyndy selden de asyp ketti...» degen edi-aý sonda sóz zergeri Sheraǵam, qalamnyń kúshi týraly qushyrlana tebirenip! «Urysta turys joq», tez arada abyz­­dyń sol aıtqandaryn aına-qa­tesiz «býyp-túıip», elektrondy posh­­tamen Máskeý asyryp jiberdim. Jıynnan oralǵan bizdiń Internews Network-Qazaqstan – halyqaralyq jańalyqtar jelisi (AQSh) uıymynyń delegasııasy Sherhan Murtaza aǵamyzdyń atyn aýyzdarynan neshe kún tastamaı aıtyp júrdi! Almatylyq áriptesterdi sondaǵy jelpindirgeni – Sherhan Murtazanyń álgi sózi qazaq, orys, aǵylshyn tilderinde jazylyp, úlken zaldyń kúlli qa­byrǵasyn alyp, semınar bitken­she shamshyraqtaı jarqyrap ilinip turǵany eken... *** Sheraǵańnyń jasy bıyl taıaý kúzde 84-ke tolady. Qolyna qalam ustamaǵany bol­masa, tyń. Baqýat. Almatyda turyp jatyr. Buqaralyq aqparat quraldary salasy qyzmetkerleri kúni qarsańynda «Egemen Qazaq­stan» gazetiniń burynǵy basshysy, Qazaqstannyń halyq jazýshysy, qazaq jýrnalıstıkasynyń aqsaqal-abyzy Sherhan Murtaza­ny gazettiń Almaty bólimshesiniń qyz-jigitteri quttyqtap baryp, gúl shoqtaryn usynyp, betinen súıip, batasyn alyp qaıtty. Gazet basshysynyń arnaıy buıryǵyna saı taǵaıyndalǵan syıaqy tapsyryldy. Qart qalamger óz tarapynan izbasar áriptesterine shyn júrekten alǵysyn aıtty. Talǵat SÚIINBAI, «Egemen Qazaqstan» ALMATY