Qazaqstan Respýblıkasy Ulttyq mýzeıinde General de Golldiń Baıqońyr ǵarysh aılaǵyna saparynyń 50 jyldyǵyna arnalǵan Sharl de Goll qorynyń prezıdenti Jak Godfren myrzanyń qatysýymen konferensııa ótti, dep habarlady Ulttyq mýzeıdiń aqparattyq-ımıdjdik qyzmeti.
Bul shara Fransııa men Qazaqstan arasyndaǵy dıplomatııalyq qatynastyń 25 jyl tolýyna arnalǵan shaǵyn mádenı maýsymnyń bastamasy bolyp sanalady.
Konferensııada sóz alǵan Fransııanyń Qazaqstandaǵy elshisi Fransıa Eten mundaı sharalardyń eki el qarym-qatynasyna oń yqpal etetinin atap ótti.
Al Sharl de Goll qorynyń prezıdenti Jak Godfren General de Goll týraly, onyń qoǵamdaǵy orny jaıynda baıandady. «Ondaǵan jyldar ótkennen keıin biz eske alyp otyratyn óz eliniń, óz memleketiniń tarıhynda óshpes iz qaldyrǵan saıası qaıratkerler endi kóp te bola bermeıdi», – dedi Jak Godfren.
Qonaqtar konferensııa barysynda Sharl de Golldiń ómiri jáne onyń Fransııa prezıdenti bolǵandaǵy qyzmeti týraly áńgimeledi. Sol sııaqty sóz sóılegender Fransııa men Qazaqstan arasyndaǵy qarym-qatynastyń serpini, General de Golldiń Qazaqstanǵa saparynyń tarıhı mańyzy jáne eki el arasyndaǵy dıplomatııalyq qarym-qatynastyń odan ári damýy týraly máselelerge toqtaldy.
Sharanyń resmı bóliminiń sońynda Ulttyq mýzeı dırektorynyń orynbasary Jáken Taımaǵambetov qonaqtarǵa alǵysyn bildirip, mýzeıdiń atynan shaǵyn estelik kádesyı tapsyrdy.
Jak Godfren Ulttyq mýzeıdiń vıtrınalarynyń birinen óziniń laıyqty ornyn alatyn Sharl de Goll qorynyń eskertkish medalin mýzeıge syıǵa tartty.