Qýat Bolatovtyń Eýropa jerin velosıpedpen sharlap júrgenine bir aıdan asty. Ol osy ýaqytta Nıderland, Germanııa, Lıhtenshteın, Shveısarııa, Fransııa, Lıýksembýrg jáne Belgııanyń iri shaharlarynda bolyp úlgeripti.
О́ziniń 3 myńnan asa oqyrmany bar Instagram paraqshasynda Q.Bolatov kúndelikti saıahatynan qyzyqty derekter keltirip otyrady. Jastaıynan álem kezýdi armandaǵan ol dúnıeni kezýge velosıpedtiń yńǵaıly kólik ekenin aıtty.
– Eger kólikpen nemese motosıklmen saıahattasańyz, bar kóńilińiz tek tastaq jolǵa aýyp, myna dúnıeniń tabıǵı sulýlyǵy men túrli mádenıet ókilderiniń tynys-tirshiliginen habarsyz qalar edińiz. Táýligine myńdaǵan shaqyrym júrseńiz, mıllıondaǵan qyzyqtan qaǵylasyz. Al velosıpedpen júrý yńǵaıly ári senimdi. Sen adamdarǵa ashyqsyń, barlyq kórinispen bite qaınasyp, tabıǵı sulýlyqty jaqynnan sezinesiń. Onyń ústine, bul kólikpen júrý – densaýlyqqa asa paıdaly, – dedi Q.Bolatov.
Buǵan deıin Túrkııa, AQSh, Ońtústik Koreıa, Reseı, Ýkraına, Qyrǵyzstan jáne О́zbekstanda bolǵan saıahatshynyń kıgen kıiminde Qazaqstannyń memlekettik rámizderi bederlengen. Saıahattaýyna álemdik ǵalamtordyń kóp kómegi tıetinin aıtqan ol Eýropa jurtshylyǵynyń bizdiń memlekettik týymyzǵa qyzyǵa qaraıtynyn, qazaq degen ulttyń jaıdary, salamatty ómirge qushtar halyq ekenin biletin bolamyz dep, únemi qonaqqa shaqyratynyn da jasyrmady.
Iran, Qytaı, Ońtústik-Shyǵys Azııa jáne Ońtústik Amerıka elderinde bolýdy kózdep júrgen saıahatshy áýeli elge kelgen soń Qazaqstannyń barlyq aımaǵyn taǵy bir aralap shyǵatynyn, buıyrtsa, osy jyldyń tamyz aıynda Astana men Almatyda baspasóz máslıhatyn ótkizbek oıy baryn jetkizdi.
Qanat ESKENDIR,
«Egemen Qazaqstan»
ALMATY