«Almaty – ómir súrý men bıznes jasaý úshin qolaıly qala» atty V ınnovasııalyq forým ótti
Forým barysyndaǵy jurt erekshe nazar aýdarǵan bir jaıt – «Qazaqstan Ǵarysh Sapary» ulttyq kompanııasy» aksıonerlik qoǵamy men Almaty qalasynyń tótenshe jaǵdaılar departamenti arasynda Almaty qalasyndaǵy Tótenshe jaǵdaılardy aldyn ala eskertý úshin ǵarysh tehnologııasyn paıdalaný týraly kásibı kelisimge qol jetkizý edi.
Atalǵan yntymaqtastyqtyń jemisi týraly aıtar bolsaq, budan bylaı taýly aýmaqtar men ózen-kólderdegi sý deńgeıiniń artýy men ulǵaıýyn qazirgi zamanǵy ǵaryshtyq tásil – aldyn ala eskertý ádisteri arqyly-aq bilýge múmkindik beredi. «Qazaqstan Ǵarysh Sapary» ulttyq kompanııasy» AQ-tyń ǵarysh júıesin qurý jáne paıdalaný jónindegi vıse-prezıdenti ǵaryshker-synaýshysy, avıasııa general-maıory A.Aıymbetov pen Ishki ister mınıstrligi tótenshe jaǵdaılar komıteti Almaty qalasy Tótenshe jaǵdaılar departamentiniń bastyǵy – órtke qarsy qyzmet general-maıory S.Áýbákirov qala turǵyndary úshin asa mańyzdy memorandýmǵa qol qoıdy.
Kezdesýge qatysyp sóz sóılegen Almaty qalasynyń ákimi Baýyrjan Baıbek «qala basshylyǵynyń servıstik qaladan ınnovasııalyq qalaǵa ótý úshin» kúsh salyp jatqanyn aıtty. «Búgingi kúnniń basty mindeti ınnovasııalyq ekojúıe úshin barynsha jaǵdaı jasaý bolyp tabylady», dedi qala ákimi.
Forýmda «Startup Kazakhstan» baǵdarlamasy tanystyrylyp, onyń ómirde iske qalaı júzege asatyn sáti kórsetildi. Sondaı-aq, álemniń aýzyn aıǵa bilegen jetekshi sarapshylarymen birge qala ómiriniń asa mańyzdy áleýmettik-ekonomıkalyq, turmystyq máselelerin oń sheshý úshin ınnovasııalyq tehnologııalardy qoldaný jaıy da keńinen talqylandy.
Baýyrjan Baıbek Almaty qalasy men qala basshylarynyń mindeti turǵyndarǵa tek qana áleýmettik qyzmet kórsetý isimen shektelip qalmaıtynyn erekshe eskertti. Búgingi tańda úlken shahardyń aldynda shaǵyn jáne orta bıznesti odan ári damytý, ınvestorlardy keńinen tartý sekildi keń óristi jobalar tur. Árıne, eń aldymen alyp megapolıstiń tabıǵat qaýipsizdigine erekshe mán beriledi. Demek, ǵaryshtyq ozyq tehnologııalardy halyq ıgiligi úshin keńinen tartýdyń kún tártibinde aldyńǵy kezekten oryn alýy da tekten-tek emes.
Forýmǵa qatysýshylar ýaqyt kóshi mindettegen ómir talabyna saı ortaq bir mámilege kelip, qulshynyspen tarady.
Talǵat SÚIINBAI,
«Egemen Qazaqstan»
ALMATY